"Yaş sözündən xoşum gəlmir. Heç kimə yaşla bağlı mənə nəsə deməsinə icazə vermirəm. Yaş mənim üçün rəqəmdən ibarətdir. Mənim üçün əsas yaşadığım həyatdır, insanların hörmətidir, ailəmdir".
Bu sözləri Teleqraf-a açıqlamasında bu gün 70 yaşını qeyd edən Xalq artisti Nisə Qasımova deyib.
Xalq artisti sənət dostlarının ona diqqətindən də danışıb: "Doğum günümlə bağlı mənə çoxlu sayda zənglər edilir. Sənət dostlarım gecədən zəng edirlər. Adətən, doğum günümü ailə üzvlərimlə sakit və gizli qeyd edirəm. Heç kimə bu haqda məlumat vermirəm".
Xalq artisti bildirib ki, onun heç zaman sənətin zirvəsinə qalxmaq iddiası olmayıb: "Mən "sənətin zirvəsi"ni fəth etmişəm və s. sözlərindən xoşum gəlmir. İnsan insanlığın zirvəsinə doğru gedər, sənətin zirvəsinə doğru deyil. Niyə? Çünki sənət sahəsində o qədər sənətkarlar var ki...Ona görə "filankəs birincidir" sözündən xoşum gəlmir. Mənim üçün yaşam və həyat tərzimin zirvəsi var. Mən sadə müğənniyəm, oxuyuram, vəssalam".
Nisə Qasımova arzusunu da dilə gətirib: "Arzudan-arzu doğur. Heç kim deyə bilməz ki, mənim bütün arzularım yerinə yetib. İnsan Allahla ünsiyyət quranda, dua edəndə həmişə ehtiyatlı olmalıdır. Gözəl arzular etməlidir. Həmişə mehriban olmalıyıq. Mənim ən gözəl arzularımdan biri insanların bir-birinə hörmət etməsidir. İnsanların mənə xoş münasibəti həyatda ən şirin nemətdir. Dünyada bundan gözəl nə ola bilər?! Heç nə...".
Süd vəzi xərçəngindən sağalan Xalq artisti səhhəti barədə də məlumat verib: "Səhhətimdə hər şey yaxşıdır. Müalicəm davam edir və sağlamlıq problemi ilə bağlı cüzi məsələlər qalıb. Onlar da inşallah yaxın günlərdə bitməlidir. Çünki yeni mahnılarım var, onları sevənlərimə təqdim etməliyəm".
Qeyd edək ki, N.Qasımova 1954-cü ildə Bakı şəhərində anadan olub.
