Şahzadə Uilyam və Şahzadə Harrinin ana tərəfdən 20 yaşlı əmisi qızı Rouzi Roçenin həyatını itirdiyi açıqlanıb. Roçenin ölümünün şübhəli olmadığı bildirilib.
Sherg.az xəbər verir ki, İngiltərə Krallıq Ailəsinin üzvləri olan Şahzadə Uilyam və Şahzadə Harrinin, mərhum Şahzadə Diananın qohumu olan 20 yaşlı əmisi qızı Rouzi Roçenin vəfat etdiyi məlum olub. Roçe, yaxınlığında odlu silah olan vəziyyətdə ölü tapılıb.
The Sun qəzetinin verdiyi məlumata görə, Rouzi Roçe Şahzadə Diananın dayısının nəvəsi olub. Gənc qadının 14 iyulda ailəsinə məxsus evdə ölü tapıldığı bildirilib. Onu anası və bacısı tapıb. Bildirilib ki, Roçe həmin an dostları ilə görüşə getmək üçün çantasını yığırmış.
Malmesburi yaxınlığındakı Norton kəndində yerləşən evdə gənc qadının cəsədinin yanında odlu silah aşkar edilib.
Məhkəmə-tibb eksperti Qrant Deyvis ilkin araşdırmalara əsasən bildirib ki, hadisədə üçüncü bir şəxsin iştirakı müəyyən edilməyib və ölüm halı şübhəli hesab olunmur.
Rouzi Roçe Durham Universitetində İngilis ədəbiyyatı üzrə təhsil alırdı. Universitetin nümayəndəsi onun "çox darıxılacaq bir tələbə" olduğunu bildirib.
Qeyd edək ki, Şahzadə Harri və Şahzadə Uilyamın digər əmisi qızı Leydi Qabriella Kinqstonun həyat yoldaşı Tomas Kinqston da 2024-cü ilin fevralında başından aldığı güllə yarası nəticəsində vəfat etmişdi. Onun da yaxınlığında odlu silah tapılmışdı.
Rouzi Roçenin ailəsi və Şahzadə Uilyamın sözçüsü hadisə ilə bağlı şərh verməkdən imtina ediblər.
