Rumıniyanın mütəşəkkil cinayətkarlıqla mübarizə prokurorluğu (DIICOT) aktyor Jan-Klod Van Damm barəsində insan alveri işi üzrə istintaq başladıb.
Sherg.az Qaynarinfo.az-a istinadən xəbər verir ki, 65 yaşlı Van Dammın 10 ildən öncə insan alverinin qurbanı olmuş rumıniyalı qadınlarla intim əlaqəyə girdiyi iddia edilir.
İstintaq materiallarına əsasən, aktyorun Kann şəhərində "hədiyyə olaraq" bir neçə qadın aldığı bildirilir. Hakimiyyət orqanlarının məlumatına görə, o, həmin qadınların istismara məruz qaldığını əvvəlcədən bilib.
Vəkil Adrian Kukulis bildirib ki, aktyor ümumilikdə "həssas vəziyyətdə" olan 5 qadınla cinsi əlaqədə olmaqda şübhəli bilinir.
Prokurorluğun məlumatına görə, insan alveri şəbəkəsi "model agentliyi" adı altında fəaliyyət göstərən iş adamı Morel Bol tərəfindən təşkil edilib. 2022-ci ildə Bol yetkinlik yaşına çatmayanların ticarəti ilə bağlı cinayət işinin əsas fiqurlarından biri kimi istintaqa cəlb olunub və bu iş üzrə araşdırmalar hələ də davam edir.
DIICOT Van Dammın adının keçdiyi cinayət işinin icraata götürüldüyünü təsdiqləyib.
