Abituriyentlərin sayı artır, rəqabət də güclənir
Bu il ali məktəblərə keçid balları arta bilər. Təhsil eksperti Kamran Əsədov bu il ali məktəblərə qəbul olmaq istəyənlərin sayında kəskin artım müşahidə edildiyini bildirib. Ən çox abituriyent sayının artımı isə 2 və 3-cü ixtisas qrupundadır. 2-ci ixtisas qrupunda ötən il ilə müqayisədə abituriyentlərin sayı 3 minə yaxın artıb. Əlbəttə, bu, rəqabət mühitini artıracaq", - deyə ekspert vurğulayıb. Ekspert onu da bildirib ki, bu il ali məktəblərə qəbul plan yeri ötən il ilə müqayisədə çoxdur. Bu heç də abituriyentlərdə arxayınlıq yaratmasın.Təhsil eksperti Elçin Süleymanov Sherg.az-a açıqlamasında qeyd etdi ki, bu il ümumi olaraq ali məktəblərə qəbul statistikası ötən illə müqayisədə, bəli, nisbətən çoxdur:
- Eyni zamanda orta ümumtəhsil məktəbləri üzrə buraxılış imtahanlarının birinci mərhələsində 300 baldan yuxarı toplayanların sayı da nisbətən yüksəkdir. Amma bunun qəbulda dövlət sifarişli plan yerlərinin sayının artmasına böyük ölçüdə təsir edəcəyini düşünmürəm. Dövlət sifarişli plan yerlərinin artırılması yeni ixtisasların əlavə edilməsiylə bağlıdır. Hesab etmirəm ki, bu, qəbulda ciddi bal artımına səbəb ola bilsin. Müəyyən spesifik ixtisaslarda, bəlkə də, mümkündür. Spesifik ixtisaslar sırasına hər il yeniləri də əlavə olunur deyə plan yerləri də buna müvafiq olaraq artırılır. Amma düşünmürəm ki, plan yerlərinin artırılması qəbulda keçid ballarının da nəzərçarpacaq dərəcədə artmasına səbəb olsun. Artım ola bilər, lakin o qədər də yüksək olmayacaq. Bu il yenə də ixtisas qrupları üzrə aparıcı universitetlərdə keçid ballarının müəyyən qədər yüksəlməsi müşahidə oluna bilər. Amma bu, o qədər də ciddi artım olmayacaq. Hesab edirəm ki, builki qəbul imtahanlarında keçid balları ortalama ötənildəkinin bənzəri olacaq.
