Heç bir məktəb rəhbərliyi bir fəndən illik ortalaması 2 olan şagirdi attestatdan məhrum edə bilməz
Buraxılış imtahanı nəticələri elan olunduqdan sonra bəzi məktəb rəhbərliyi tərəfindən valideynlərlə əlaqə qurularaq "filan fəndən övladınız 2 qiyməti alıb və buna görə də attestatına 2 yazılacaq" deyə qorxuducu zənglər edərək, gəlib məktəb rəhbərliyi ilə görüşməsi istənilir. Hətta uşağın bu vəziyyətdə attestat ala bilməməsi barədə valideyni həyəcanlandırırlar.
Valideyn də uşağın buraxılış imtahanındakı real nəticəsinin zəif olduğunu gördüyü üçün təşvişə düşür və çıxış yolu axtarmağa başlayır.
Maraqlıdır, şagirdlərin qiymətləndirilməsinə buraxılış imtahanı nə kimi təsir göstərir?
Təhsil eksperti Ramin Nurəliyevin “Sherg.az"a açıqlamasına görə, əgər şagird 10 və 11-ci sinfi 4-5 qiymətlərlə bitiribsə, illik qiymətləri buraxılış imtahanı xaric 4 və yaxud da 5 olarsa, buraxılış imtahanını nəticəsinə görə qiyməti 2 olsa belə, bu şagirdin illik ortalaması 2 olmur və ona ümumi illik qiyməti 2 yazıla bilməz:
"Buraxılış imtahanının 2 olması şagirdin ümumi nəticəsinin 2 olması demək deyil. 11 il məktəbdə əziyyət çəkib 4-5 ilə oxuyan şagird bir imtahanın nəticəsi ilə ümumi qiymətləndirilməməlidir. "Təhsil haqqında" qanunda və şagirdlərin ümumi qiymətləndirilməsi qaydasında belə bir qayda yoxdur. Bu vəziyyətdə hər hansı bir fəndən yarımillik qiymətlərinə görə 4, 5 alan şagird buraxılış imtahanında 2 alsa da, onun ortalaması hardasa 3 və yaxud da 4 kimi qiymətləndirilməlidir.
Tutaq ki, şagird məktəbdə hər hansı bir fəndən illik olaraq 2 alacaq və buraxılış imtahanından da nəticəsi 2 qiyməti ilə nəticələndi. Bu vəziyyətdə belə şagirdin illik qiyməti 2 yazılır və onun attestat alması təmin olunur. Sadəcə, attestatda həmin fənnə 2 qiyməti yazılır, vəssalam. Heç bir məktəb rəhbərliyi bir fəndən illik ortalaması 2 olan şagirdi attestatdan məhrum edə bilməz.
Buna görə də, bəzi məktəb rəhbərliyinin valideynləri təşvişə salması əsassızdır, əgər bunun arxasında hər hansı bir tamah məqsədli plan varsa, bu, qanunsuzdur. Bu kimi hallar ilə qarşılaşan valideynlər mütləq MÜTDA-ya və yaxud da Elm və Təhsil Nazirliyinə müraciət etməlidirlər”.
