"Tesla"nın Cybertruck modeli, uzun müddət şarjda qaldıqdan sonra işləməz hala gəlib. Şirkət texnikləri avtomobili detallı yoxlama üçün servis mərkəzinə aparıblar.
Sherg.az xəbər verir ki, "Tesla Cybertruck" sahibi AJ Esguerra, uzun tətil müddətində avtomobilini şarjda saxlayıb. Evə döndükdə isə avtomobilin işə düşmədiyini görüb. Esguerra "Tesla"-ya müraciət edərək bu mesajı paylaşıb:
"Köməyə ehtiyacım var. 2 həftə tətildəydik və yeni qayıtdıq, amma Cybertruck heç açılmır. Tətbiqimə baxdım və son olaraq 11 gün əvvəl əlaqə qurulduğunu göstərir."
Arizona ştatındakı rekord səviyyəli isti hava şəraitinin daimi şarjda qalan avtomobilə təsir etdiyini düşünən Esguerra, Tesla texniklərini çağırıb. Texniklər avtomobili işə salıb və daha geniş texniki analiz üçün servis mərkəzinə aparıblar.
Servis mərkəzində aparılan yoxlamalar nəticəsində məlum olub ki, "Cybertruck"-ın işləməməsinə səbəb enerji çeviricisindəki nasazlıq olub.
