Samsung və Caviar şirkətləri Galaxy S25 Ultra Viper-in John Wick temalı xüsusi versiyasını təqdim ediblər. Yalnız bir ədəd istehsal ediləcək ultra-lüks cihaz istifadəyə yararlı, eksklüziv kolleksiya əşyasına çevriləcək.
Sherg.az xəbər verir ki, Lüks fərdiləşdirmə brendi "Caviar" şirkətləri 2025 Mobil Dünya Konqresində (MWC 2025) Samsung Galaxy S25 Ultra-nın John Wick temalı xüsusi buraxılışını təqdim edib. Bu ultra-premium cihaz dərin qara titan korpusa, 24 karat qızılla örtülmüş detallara və John Wick-in simvolik silahlarına istinad edən dizayna malikdir.
Galaxy S25 Ultra Viper 6,9 düymlük Quad HD+ Dinamik AMOLED ekranı ilə üstün görüntü keyfiyyəti təklif edir. Snapdragon 8 Elite prosessoru ilə təchiz edilən cihaz istifadəçilərə 12 GB RAM və 1 TB yaddaşla yüksək performans və böyük yaddaş imkanı verir.
Dəbdəbəni texnologiya ilə birləşdirən cihaz 200MP əsas sensor, 50MP ultra geniş bucaq, 10MP telefoto (3x optik zum) və 50MP periskop obyektivi (5x optik, 100x Space Zoom) kimi qabaqcıl kamera xüsusiyyətləri ilə seçilir.
Bəs, Samsung Galaxy S25 Ultra Viperin dəyəri nə qədərdir?
Bu xüsusi buraxılış smartfonunun yalnız bir ədədi istehsal olunacaq və 9000 dollara satılacaq. Cihazın kimə satılacağının necə müəyyən ediləcəyi ilə bağlı heç bir açıqlama verilməyib.
Caviar, fərdiləşdirilmiş lüks smartfonlar və aksesuarlar istehsal edən bir markadır. Şirkət xüsusi olaraq iPhone və Samsung Galaxy modellərini qızıl örtük, qiymətli daşlar və xüsusi dizaynlarla bəzəyərək unikal və daha yüksək qiymətli məhsullara çevirir. Caviar məhdud sayda istehsal edilən xüsusi qurğularla kolleksiyaçılar və lüks həvəskarları cəlb edir.
Caviar, Snowflake adlı xüsusi dizayn edilmiş iPhone 16 Pro Max-ı 580.000 dollar qiymətə təklif etməklə diqqət çəkdi. Bu cihaz 18 karat ağ qızıl və 570 brilyant parçası ilə bəzədilmiş model idi.
