Qazaxıstanda süperkompüterin istifadəyə verilməsi qarşıdakı on gün ərzində baş tutacaq. Bu texnologiya texnogen qəzaların proqnozlaşdırılması, şəhər trafikinin analiz olunması və süni intellekt məhsullarının xarici serverlərə ehtiyac olmadan işə salınması kimi imkanlar yaradacaq.
AZƏRTAC xəbər verir ki, bu barədə “Kazakhtelecom” ASC-nin İdarə Heyətinin sədri, Qazaxıstanın rəqəmsal inkişaf üzrə keçmiş naziri Baqdat Musin Telegram kanalında məlumat verib.
“Dünən anbara baş çəkdik… Videokartlar artıq yerindədir. NVIDIA H200 bazasında qurulan süperkompüterimiz artıq ölkəyə gətirilib. Çox yaxında Almatıda “Kazakhtelecom”un məlumat mərkəzi sahəsində quraşdırma işlərinə başlayacağıq. Təxminən 10 günə istifadəyə hazır olacaq. Heç də şişirtmədən deyirəm... Güclü cihazdır: 6,7 milyon CUDA nüvəsi, 1600 petaflops hesablama gücü və onlarla terabayt GPU yaddaşı”, – deyə Musin bildirib.
O qeyd edib ki, süperkompüter dövlət qurumları, milli şirkətlər və korporativ sifarişçilər üçün əlçatan olacaq. Onun vasitəsilə texnogen qəza və risklər hadisədən xeyli əvvəl modelləşdirilə, şəhər trafikinin proqnozlaşdırılması həyata keçirilə, həkimlərə böyük məlumat bazası əsasında daha tez diaqnoz qoymaqda yardım edilə bilər. Həmçinin süperkompüterdə qazax dilini, mədəniyyətini, tarixini və müasir konteksti anlayan dil modelləri hazırlanacaq. Beləliklə, süni intellekt məhsullarını xarici serverlərə bağlı olmadan ölkə daxilində işlətmək mümkün olacaq.
Qazaxıstanın Rəqəmsal İnkişaf Nazirliyi hələ may ayında bildirmişdi ki, ölkəyə Mərkəzi Asiyanın ən güclü süperkompüteri gətirilib. Bu cihaz NVIDIA H200 qrafik çipləri əsasında qurulub və təqribən 2 eksaflops gücündədir. Sonradan məlum olub ki, ABŞ-ın “Nvidia” texnoloji şirkəti tərəfindən Qazaxıstana ikinci süperkompüter də veriləcək. Onun hesablama gücü 56,4 petaflops təşkil edəcək.
