Bölgələrdə kombayn çatışmazlığı: Fermerlər taxıl itirir

Hazırda ölkədə taxıl biçini sezonudur. Kənd Təsərrüfatı Nazirliyi fermerlərin məhsullarını itkisiz yığmaq üçün öz köməkliyini göstərir. Amma biçinlə bağlı problemlər də var. Məsələn bu günlərdə jurnalist həmkarımız Elşad Paşasoy Feysbuk səhifəsində paylaşım edərək Yardımlı rayonunda taxıl yığımında problemə diqqət çəkib. Bir növ nazirliyə, aidiyyatı qurumlara üzünü tutan jurnalist qeyd edib ki, Muğanda taxıl biçiminə diqqət göstərilir: “Buna görə təşəkkürlər! Amma ucqar rayonlarda yaşayan insanlarımız da zəhmət çəkiblər, əkiblər, qoruyublar. İndi nəyə görə kombayn olmamasının əzabını yaşamalıdırlar? Kəndlilər deyir Allah bol məhsul verdi, amma gözlərimiz yolda qaldı. Hər hektara görə həssas münasibət olmalıdır. Ölkəboyu əkin sahələri biçilib qurtarıbsa, nədən kombaynlar qalan sahələrə yönəldilmir?.. İmkan tapın, gedin, əkinçini dinləyin, arzu-istəyini eşidin, onda taxıl bol da olar, ucuz da. Vətən də basılmaz!”. 

Fermerlər biçin üçün kombayn çatışmazlığının göstərildiyini qeyd edirlər. Kənd təssərrüfatı üzrə ekspert Qadir Bayramlı “Şərq”ə deyib ki, bölgələrdə texnika, kombayn problemlərinin aradan qaldırılması, fermerlərin bu kimi problemlərlə qarşılaşmaması üçün hansı addımlar atılmalıdır:
“1990-cı illərlə müqayisədə bu gün ölkədə kənd təsərrüfatı sahəsində  inkişaf özünü göstərir. Əvvəlki illərə baxanda problemlər aradan qaldırılıb. Ölkədə  kombaynların, teknikanın sayı artıb. Əvvəllər kombayn sayının azlığından  biçin zamanı gecikmələr olurdu ki, bu da  xeyli məhsulun zay olması ilə nəticələnirdi. Amma “Aqrolizinq”in  təsdiqindən sonra xeyli problemlərin aradan qalxdı. Sadəcə bu gün müəyyən bölgələrimizdə kombayn qıtlığı hiss olunur. Xüsusilə dağətəyi  bölgələrdə çətinliklər daha çox özünü göstərir. Çünki dağ ətəyi bölgələrdə taxıl daha gec yetişdiyindən, bu regionlarda fermerlər kombayn qıtlığı yaşayırlar. Taxıl biçini zamanı kombayn qıtlığının olmasının bir neçə səbəbi var. Əsas səbəblərdən biri kombayn sayının ümumilikdə az olmasıdır. Digər bir səbəb, kombaynlardan hamı eyni vaxtda istifadə etməyə çalışır. Fermerlər hamısı gecikmədən taxılını biçdirməyə çalışır ki, bu da mövcud qıtlığa şərait yaradır”. Ekspert vurğulayıb ki, ciddi səbəblərdən biri də kombaynların bölgələr üzrə düzgün paylanmamasıdır: “Bu mənim şəxsi fikrimdi. Rayonların bəzilərində kombaynlar biçin mövsümündə boş dayanır, bəzilərində isə çatışmır. Deməli, bu sistemli şəkildə  nəzarətə götürülməlidir. Biçindən xeyli müddət əvvəl  taxıl sahələri nəzarətə, qeydiyyata götürülməli, bu problemin həlli üçün  qrafik hazırlanmalıdır. Vacib məqamlardan biri isə odur ki, iqlim şəraitinə görə paylaşım aparılmalıdır. Fikrimcə, taxılçılıq bölgələri əvvəlcədən qeydiyyata götürülməli, rayonlar üzrə paylaşıma  xüsusi mərkəz nəzarət etməlidir. Kənd Təsərrüfatı Nazirliyinin bölgələrdə olan idarələrində bu sistemli şəkildə idarə olunmalıdır. Ölkədə olan kombaynlardan düzgün və səmərəli istifadə edilərsə düşünrəm ki, Azərbaycanda taxılın biçilməsi zamanı bu problemlər olmayacaq”. 

Paylaş

Bizi Facebookda izləyin
Tahirə Məmmədqızı Yazarın yazıları
menu
menu