Ərdoğan hökuməti hələ güclüdür


Əli Babacanın AKP-dən getməsi ciddi dəyişikliyə səbəb olmayacaq
Türkiyənin keçmiş xarici işlər naziri Əli Babacan hakim Ədalət və İnkişaf Partiyasından istefa verib. AKP-nin qurucularından olan Babacanın sabiq prezident Abdullah Güllə birlikdə siyasi partiya təsis edəcəyi gözlənilir. İddialara görə, əslində yeni partiya hazırdır, proqram yazılıb və adı verilib. Sadəcə təsisçilər heyətini təyin etmək qalıb.
Türkiyə Prezidenti Rəcəb Tayyib Ərdoğan da sabiq nazir Əli Babacanın partiyadan istefa verməsinə münasibət bildirib. Ərdoğan jurnalistlərə verdiyi açıqlamada Əli Babacan, Abdullah Gül və Əhməd Davudoğlu ilə bağlı “bu ümməti parçalamağa haqqınız yoxdur” ifadəsini işlədib: “Mən Əli bəyin özünə də dedim, bu sizin yolunuzdur, amma onu da yaddan çıxarmayın ki, bu ümməti parçalamağa haqqınız yoxdur. Sizin atdığınız addımlar partiyamızın parçalanmasına səbəb ola bilər, amma bunu etməklə heç bir nəticə əldə edə bilməyəcəksiniz”. Ekspertlərin fikrincə, Babacan kimi bir qurucunun AKP-dən ayrılması hakim partiyanı bir qədər zəiflədə bilər. 
Qardaş ölkənin siyasi həyatında baş verənləri “Şərq”ə dəyərləndirən gənc politoloq Rusif Məmmədsoy deyib ki, Türkiyədə AKP-nin qurucularından hesab edilən Əli Babacanın istefası gözlənilməz hadisə deyildi.  Analitik bildirib ki, Əli Babacan, Abdullah Gül və Əhməd Davudoğlunun yeni partiya yaradacaqları iddiası çoxdan gündəmdədir. Ona görə də Babacanın hakim partiyadan getməsi təəccüblə qarşılanmamalıdır: “Babacanın istefası AKP-yə müəyyən mənada mənfi təsir göstərə bilər. Lakin bu itki ciddi dəyişikliyə səbəb olmayacaq. Çünki Ərdoğan hökuməti hələ güclüdür. Yeni yaranacaq partiya böyük uğur əldə edə bilməyəcək. Əslində bunu partiya qurucuları da yaxşı anlayır. Əgər Türkiyənin siyasi arenasında AKP iqtidardan düşərsə, onun yerinə yeganə namizəd CHP olacaq. Burada Kamal Kılıçdaroğlunun uğursuzluqları deyil, Məhərrəm İncə və Əkrəm İmamoğlunun uğurları ön plana çıxacaq”. Ekspertin sözlərinə görə, siyasətdə partiyadan ayrılma manevrləri olmalıdır: “Babacanın partiyası ilə AKP arasında ideoloji zəmində hər hansı ziddiyyət olarsa, yenə də uğursuzluq qaçılmaz olacaq. Nəzərə alaq ki, Ərdoğan hökuməti 2023-cü ilə, yəni Cümhuriyyətin 100 illiyinə meqa layihələr hazırlayıb. Hakim partiyanın böyük planları var və ciddi təbliğat aparır. Bu mənada növbəti seçkilərə qədər rəqib siyasi düşərgələr arasında gərgin mübarizəyə şahidlik edəcəyik”. 

Paylaş

Bizi Facebookda izləyin
İsmayıl Qocayev Yazarın yazıları
menu
menu