Turizm Agentliyinin sədri: Şəkidə baş vermiş hadisədə xəsarət alanların əksəriyyətinin vəziyyəti stabildir


İyulun 14-də günorta saat 12 radələrində Şəki Xan Sarayının qarşısında baş vermiş hadisə - çinar ağacının budağının qırılaraq yerə düşməsi nəticəsində xəsarət alan 19 nəfərdən 12-si Azərbaycan, 5-i Suriya, 2-si isə Rusiya vətəndaşıdır. Xəsarət alanların hamısı təcili olaraq Şəki Rayon Mərkəzi Xəstəxanasına yerləşdirilib. Onların əksəriyyətinin vəziyyəti stabildir. Dörd nəfərin səhhəti isə ağır olduğundan Bakıdan gələn təcrübəli həkim-mütəxəssislər onların paytaxta göndərilməsi barədə qərar veriblər. Hazırda onlardan üçü FHN-nin helikopteri, biri isə təcili yardım avtomobili ilə Bakının tibb müəssisələrinə göndərilir.

AZƏRTAC-ın bölgə müxbiri xəbər verir ki, bu barədə Dövlət Turizm Agentliyinin sədri Fuad Nağıyev Şəkidə jurnalistlərə açıqlamasında məlumat verib.
Qurumun sədri bildirib ki, hadisə baş verən kimi Dövlət Turizm Agentliyinin rəhbərliyi Şəkiyə gəlib. Digər əlaqədar dövlət qurumlarının nümayəndələri də hadisə ilə bağlı Şəkidədirlər.
Agentliyin sədri bildirib ki, sosial şəbəkələrdə hadisə zamanı ölənlərin də olduğu barədə məlumatlar yayılır. Bu, tamamilə yanlış məlumatdır. Hadisə zamanı yalnız 19 nəfər müxtəlif dərəcədə xəsarətlər alıb.
F.Nağıyev baş vermiş hadisə nəticəsində xəsarət alan şəxslərin sağlamlıq durumunun dövlət başçısının xüsusi nəzarətində olduğunu vurğulayıb.

Paylaş

Bizi Facebookda izləyin
menu
menu