Deputatın oğlunun və qohumlarının zorakılığı: "Heç kim dövlət orqanının işinə mane olmamalıdır"

"Relax” İstirahət Mərkəzinə gələn Vergilər Nazirliyinin əməkdaşlarını döydüyünə görə, Milli Məclisin deputatı İqbal Məmmədovun oğlu Mirhəmid Nərimanlı haqqında məhkəmə qərar çıxarıb. Unikal.org-un əldə etdiyi məlumata görə, Nəsimi rayon Məhkəməsinin qərarı ilə Mirhəmid Nərimanlı haqqında 3 aylıq həbs qəti imkan tədbiri seçilib
Hadisə ilə bağlı Daxili İşlər Nazirliyi və Baş Prokurorluğun mətbuat xidmətləri də məlumat yayıblar. Məlumatda bildirilir ki, Daxili İşlər Nazirliyi və Baş Prokurorluq tərəfindən vəziyyət dərhal nəzarətə götürülmüş, operativ tədbirlər həyata keçirilməklə ictimai asayiş bərpa olunmuş, vergi əməkdaşlarının “Relaks” istirahət mərkəzində vergi nəzarəti tədbirinin keçirilməsinə zəruri şərait təmin edilmişdir. Cinayət işi üzrə kriminalistik texniki vasitələrdən istifadə olunmaqla hadisə yerinə foto və videoçəkiliş aparılmaqla baxış keçirilmiş, hadisələrin baş vermə məkanı fiksasiya olunmuş, maddi sübutlar götürülmüş, hadisənin şahidləri müəyyənləşdirilərək dindirilmiş, məhkəmə-tibbi, məhkəmə-əmtəəşünaslıq, məhkəmə-trasoloji ekspertizalar təyin edilmişdir.
İş üzrə istirahət mərkəzinin təşkilati-sərəncamverici və inzibati funksiyaları yerinə yetirən vəzifəli şəxsləri - Nərimanlı Mirhəmid İqbal oğlu, Nərimanlı Orxan Çingiz oğlu, Əsgərov Pərviz Əvəzoviç, İmanov Famil Kamran oğlu, Şahverdiyev Rahim Bəhlul oğlu və Abbasov Amir Nağızadə oğlu Cinayət Məcəlləsinin 309.2 (vəzifə səlahiyyətlərini ağır nəticələrə səbəb olmaqla aşma) və 315.2-ci (hakimiyyət nümayəndələrinə həyat və sağlamlıq üçün təhlükəli olan zor tətbiq etmə) maddələri ilə təqsirləndirilən şəxs qismində cəlb olunaraq barələrində məhkəmənin qərarı ilə həbs qətimkan tədbiri seçilmişdir.
Hadisə ilə bağlı firiklərini Sherg.az-la bölüşən “Səs” qəzetinin baş redaktoru, “Səs” Media Qrupunun rəhbəri Bəhruz Quliyev bildirdi ki, sahibkarlığın inkişafı dövlətin prioritet sahəsidir, lakin bu, heç bir sahibkara dövlət orqanının işinə mane olmağa haqq vermir:
"Bilirsiz ki, cənab Prezident sahibkarlara kömək, sahibkarlığın stimullaşdırılması məqsədilə əsassız yoxlamaları rəsmi şəkildə qadağan edib. Ölkədə biznesin, orta və iri sahibkarlığın inkişafı etdirilməsi istiqaməti götürülüb. Sahibkarlığın inkişafı üçün bir sıra addımlar atılır, kreditlərin verilməsi və sairə kimi. Yəni ölkədə azad sahibkarlığın inkişafı üçün münbit şərait yaradılması göz önündədir. Amma bu, heç kimə, heç bir sahibkara dövlət orqanının işinə müdaxilə etmək, fəaliyyətinə mane olmaq hüququ vermir. Dövlət orqanının işinə mane olmaq cinayət məsuliyyəti üçün əsasdır. Dövlət qurumu qanuni şəkildə yoxlamalar aparmalıdırsa, buna mane olmaq hüquqa zidd əməldir. Sahibkar, ya qeyrisi, fərq yoxdur, dövlət orqanının işinə müdaxilə etmək olmaz. Söhbət iaşə obyektindən gedirsə, əksinə, yoxlamaları aparılması sahibkara köməkdir ki, bunun sayəsində vətəndaşlara xidmətin keyfiyyəti artırıla bilər. Dövlətə vergi ödənməlidir. Hər hansı digər vacib ödəmələr varsa, onlar da vaxtlı-vaxtında ödənməlidir. Heç kim dövlət orqanının işinə mane olmamalıdır.

Paylaş

Bizi Facebookda izləyin
Məlahət Rzayeva Yazarın yazıları
menu
menu