Onlar Azərbaycan dövlətinə pəncə atmağa çalışan imperializm "qartalının caynaqları"dır

Azərbaycan Respublikası Baş nazirinin müavini, Yeni Azərbaycan Partiyası Sədrinin müavini-İcra katibi Əli Əhmədov xaricdə fəaliyyət göstərən siyasi mühacirlərlə bağlı feysbuk hesabında paylaşım edib. O, bildirib ki, hazırda ölkələrin daxili işlərinə qarışmağın, onlara qarşı təbliğat aparmağın, seçki proseslərinə müdaxilə etməyin yeni forması sınaqdan keçirilir. Bunlardan biri internet televiziyalardır:
“Müxalifəti dəstəkləməyin və maliyyələşdirməyin yeni forması kimi internet televiziyalardan və digər texnologiyalardan geniş istifadə edilir. Ən acınacaqlısı da odur ki, ayrı-ayrı yad və təhlükəli maraqlar naminə Azərbaycana qarşı çirkin yalan və böhtan kampaniyası siyasi mühacir kimi sığınacaq verilmiş və təbii ki, satılmış azərbaycanlı müxalifət təmsilçiləri tərəfindən aparılır. Yalnız sadəlövh adamlar düşünə bilər ki, internet TV-lər məhdud maliyyə resursları ilə yaradılır və işlədilir. Xeyr. Sığınacaq tapdığı ölkədə heç bir işlə məşğul olmayan insanın malik olduğu resurslar internet TV işlətmək kimi heç də az vəsait tələb etməyən məşğuliyyətlə adekvat deyil. Sizi əmin edirəm ki, həmin adamlara lazımınca maliyyə dəstəyi edilir. Sözügedən TV sahiblərindən biri təkcə reklamına ayda 10 min dollar pul xərcləyir. Deməli, söhbət Azərbaycana qarşı geniş təbliğat şəbəkəsinin yaradılmasından gedir və bir daha təkrar edirəm ki, bu iş Azərbaycanın müxalifətinin bəzi təmsilçilərinin əli ilə həyata keçirilir”.
Məsələ ilə bağlı Sherg.az-a danışan tanınmış jurnalist Tural İsmayılov bildirdi ki, xaricdə yaşayan mühacirlər ölkəmizə qarşı fəaliyyət göstərərək müəyyən qrantlar alırlar:

“Xaricdə mənzillənən və dövlətimizə hücuma keçən adamları bir neçə aspekt birləşdirir. Birincisi AXCP və Əli Kərimliyə yaxın adamların çevrəsi. Onların ümdə məqsədi bütün atılan addımlara qarşı hücum etmək, hakimiyyəti gözdən salmaq üçün ancaq neqativə köklənmiş siyasi xətt yeritməkdir. Hansı ki, bu adamların mahiyyəti onların müdafiə etdiyi ideallara uduzur. İkincisi Vidadi İsgəndərli, Rafael Piriyev, Qalib Məmmədov və sair kimi psxi problemli, savadsız, tərbiyəsiz söyüş mexanizatorları. Hansı ki bu adamların başdan ayağa idbar qoxan təhqir hücumları nəinki siyasətin etikasına, heç normal insani keyfiyyətlərə də sığmır. Üçüncüsü isə, Məhəmməd Mirzəli, Tural Sadiqli və digərlərinin təmsil olunduğu qrup. Bu adamlar isə qrantlar, dilənçiliklə toplamağa çalışdıqları "ianələr" və iyrənc, aldadıcı başlıqlarla Yutubda gələn baxışa görə pul qazanmağa çalışırlar. Bunları birləşdirən tək "dəyər" isə dəyərsizlikdir. 
Aydındır ki, geopolitik situasiyadan narahat olanlar, Azərbaycanın xarici müstəqil siyasət kursunu həzm etməyənlər, son zamanlar ölkə başçısı tərəfindən başlanan islahatlara kölgə salmaq istəyən erməni lobbiləri, Azərbaycan düşmənləri tərəfindən bu adamların internet tv və sosial media məcralarına dəstək olunur. Onlar Azərbaycan dövlətinə pəncə atmağa çalışan imperializm "qartalının caynaqları"dır və o caynaqda da qalacaqlar”.

Paylaş

Bizi Facebookda izləyin
Yeganə Bayramova Yazarın yazıları
menu
menu