Zamanın tələbi: Dövlət idarəçiliyində gənclərə yol açılır

“Yuxarı hakimiyyət orqanlarında aparılan kadr dəyişiklikləri Azərbaycanda gedən islahat prosesinin tərkib hissəsidir”. Bunu Sherg.az-a açıqlamasında millət vəkili Aydın Mirzəzadə deyib. 

Deputat bildirib ki, Azərbaycan öz dövlətçilik inkişafında zaman-zaman daha yüksək mərhələyə qalxır və müəyyən dövrdə dövlətçiliyə, inkişafa öz tövhəsini vermiş insanların yenisi ilə əvəzlənməsinə ehtiyac yaranır: 

“Yeni simalar yeni enerji və yeni baxışdır. Bir tərəfdən əvvəlkilərin fəaliyyətinə cənab Prezident tərəfindən yüksək qiymət verilir, dövlətə xidmətinə görə təşəkkür edilir, eyni zamanda, gənclərə də yol açılır. Bu, zamanın tələbidir. Bütün dünyada tətbiq edilən proqressiv bir yanaşmadır və Azərbaycanda da uğurla tətbiq edilməkdədir. Kadr dəyişikliyinin ancaq son zamanda baş verdiyini söyləmək düzgün olmazdı. Hər dövrdə kadrlar əvəzlənir, yeni simalar gəlir. Biz dövlətə bağlı olan, Prezidentin komandasında layiqli yer tutan yeni insanlara rast gəlirik. Son dövrdəkilərin ölkənin həm dövlətçilik, həm də iqtisadi sahədə inkişafında yeni yanaşma tətbiq edən kadrlar olduğunun şahidiyik. Hesab edirəm ki, yeni təyinatlar qarşımıza qoyulan vəzifələrin daha yüksək səviyyədə və daha səmərəli həyata keçirilməsinə ümidlərimizi doğruldacaq. Əsas məqam ondan ibarətdir ki, təyin edilənlər Azərbaycan cəmiyyətinə tanış insanlardır. Onlar əvvəlki postlarında öz fəaliyyətləri ilə müsbət nəticə ortaya qoya biliblər. Onların iş metoduna, dövlətə, Prezidentə sədaqətinə hər hansı bir şübhə ola bilməz”.



Aydın Mirzəzadə: "Yeni təyinatlar qarşımıza qoyulan vəzifələrin daha yüksək səviyyədə və daha səmərəli həyata keçirilməsinə ümidlərimizi doğruldacaq"


Milli Məclisin üzvü vurğulayıb ki, aparılan uğurlu siyasi kurs kadrların yeni vəzifələri ilə bir daha həyata keçirilir: 

“Cənab Prezidentin kadr siyasətində gənclərə zaman-zaman yer verilir. Eyni zamanda təcrübəli insanların da potensialından maksimum istifadə edilməsinə önəm verilir. Aparılan kadr dəyişiklikləri şübhəsiz ki, Azərbaycanın qarşısında duran problemlərin daha çevik və daha keyfiyyətli həll edilməsinə gətirib çıxaracaq. Cənab Prezident nazirləri qəbul edərkən də problemlərdən məlumatlı olduğunu və həmin məsələləri qruplaşdırdığını görürük. Digər tərəfdən isə təyin edilən insanların qarşısına konkret vəzifələr qoyulur. O vəzifələr ki, Azərbaycanın müstəqilliyini möhkəmlətməli, iqtisadiyyatımızı inkişaf etdirməli, insanların sosial vəziyyətinin daha da güclənməsinə xidmət etməli və hər bir Azərbaycan vətəndaşının maraqlarının aparılan siyasətin mərkəzində durmasına kömək etməlidir. Hesab edirəm ki, təyinatlar düzgün aparılıb və təyin edilən şəxslər Prezidentin etimadını doğruldacaq”.

Paylaş

Bizi Facebookda izləyin
İsmayıl Qocayev Yazarın yazıları
menu
menu