Ağ rəngli "qara ölüm" - İranlı Bakıda öldürücü maddələrdən qənd hazırlayır

Gəlir əldə etmək üçün insan həyatını təhlükəyə atan müəssisələr var. Ötən gün ARB-nin yayımladığı süjetdən aydın olub ki, qənnadı məmulatları istehsal edən bir sıra şirkətlər qəndin ağardılması məqsədi ilə insan orqanizmi üçün ciddi təhlükə yaradan kimyəvi maddələrdən istifadə edirlər. Televiziya kanalının məlumatına görə, belə müəssisələrdən biri Binəqədi rayonunda yerləşir.

Həmin müəssisənin sahibi isə İran vətəndaşıdır. Şirkətin Əhməd Rəcəbli küçəsi, 53 ünvanında yerləşən anbarına baxış zamanı qida məhsullarında istifadəsi qadağan olunmuş 79 kiloqram toz halında ağardıcı kimyəvi maddə aşkar olunub. Məsələ ondadır ki, istehlakçıların daha çox bəyaz qəndə üstünlük verməsi işbazlar üçün bir fürsətə çevrilib. Fürsəti əldən verməyən bəzi şirkətlər öldürücü kimyəvi maddələrlə istehsal etdikləri “ağ” qəndləri insanlara satırlar.

İlk baxışda ağlığı cəlbedici görünən bu cür məhsullar əslində orqanizm üçün çox fəsadlar törədir. Azərbaycan Qida Təhlükəsizliyi Agentliyinin (AQTA) mətbuat katibi Aysel Fərziyevanın sözlərinə görə, məsələnin ciddiliyini nəzərə alaraq, aidiyyəti qurumlara məlumat verilib: “Korrupsiyaya qarşı mübarizə idarəsi və AQTA-nın əməkdaşları tərəfindən məhkəmə qərarı ilə müxtəlif istiqamətlərdə genişmiqyaslı əməliyyat tədbirləri başladılıb. Baxış zamanı bəzi müəssisələrdə natrium-ditionitin istifadə olunduğu aşkarlanıb. Bəlli olub ki, bu maddələr qəndlərin ağardılmasında istifadə edilir”.



Eyyub Hüseynov: “Araşdırma nəticəsində bəlli oldu ki, qənd istehsal edən 80 faiz müəssisədə saxta yollara əl atılır”


Əhalinin narahatlığına səbəb olan məsələni “Şərq”ə dəyərləndirən Azad İstehlakçılar Birliyinin sədri Eyyub Hüseynov deyib ki, il yarım bundan qabaq sözügedən problemlə bağlı müvafiq qurumlara xəbərdarlıq edib.

AİB rəhbərinin sözlərinə görə, 19 yerli qənd istehsalçılarının məhsullarının ekspertizası xoşagəlməz nəticə ilə başa çatıb: “Araşdırma nəticəsində bəlli oldu ki, 80 faiz müəssisədə kəllə qənd hazırlamaq üçün “mərkəzdənqaçma” qüvvəsinə əsaslanan “sentrafuqa” qurğularından istifadə olunmur. Həmin müəssisələr kimyəvi maddələrdən yararlanırlar. Biz bununla bağlı dövlət orqanlarına müraciətlər etdik və ictimai rəy yaratdıq. Lakin qənd hazırlayan zavodlar yenə də öz işlərini davam etdirdilər. Bilirsiz ki, sarı rəngli şəkər tozundan qənd hazırlamağın və onun ağartmağın iki yolu var. Birinci üsul “sentrafuqa” qurğuları vasitəsi ilə, yəni sürətli fırlanma prosesi hesabına qəndin sarı ləkədən təmizlənməsidir. Məsələ ondadır ki, “sentrafuqa” aparatları çox bahadır. Buna görə də bəzi müəssisələr, kiçik qənd sexləri daha ucuz başa gələn kimyəvi maddələrə üstünlük verirlər. Bu da insan sağlamlığı üçün zərərlidir”. 



E.Hüseynov bildirib ki, qənd istehsal edən müəssisələrdə ciddi araşdırmalar aparılmalı və “sentrafuqa” aparatı olmayanlar məsuliyyətə cəlb olunmalıdır:

“Çox güman ki, bu işlə təkcə İran vətəndaşı yox, yerli sexlərimizdən bəziləri də məşğul olurlar. Ona görə də AQTA daha qətiyyətli addım atmalıdır”. 

Paylaş

Bizi Facebookda izləyin
İsmayıl Qocayev Yazarın yazıları
menu
menu