Şəxsi obyektlərin tikintisi üçün... - İctimai yerlər, həyətlər, hətta məktəblərin ərazisi tutulur

“Bu da həm sakinlərə problem yaradır, həm də şəhər infrastrukturunu qəlizləşdirir və yükləyir”



Prezident İlham Əliyev Bakı Şəhər İcra Hakimiyyətinin başçısı Eldar Əzizovu qəbul edərkən ictimaiyyəti narahat edən mühüm məqamlara toxunub. Dövlət başçısının toxunduğu problemlərdən biri də binalararası həyətlərin və ictimai yerlərin olmaması olub. Ölkə rəhbəri vurğulayıb ki, evlərarası həyətlər bəzi hallarda zəbt olunur və ictimai istifadə üçün yerlər yoxa çıxır: “Biz bilirik ki, bir çox binalarda, bloklarda vəziyyət ürəkaçan deyil, lift təsərrüfatı köhnəlib. Ona görə nümunəvi həyətlərin qurulması çox böyük məna daşıyır. Biz bu sahəyə kompleks şəkildə yanaşmalıyıq. Əlbəttə ki, həyətlər, ilk növbədə, vətəndaşlar üçün rahat, işıqlı olmalıdır, təhlükəsizlik baxımından tədbirlər görülməlidir. Bir çox inkişaf etmiş ölkələrin şəhərlərində həyətlərdə təhlükəsizlik kameraları qoyulur.

İndi Bakı şəhərində bir çox yerlərdə təhlükəsizlik kameraları qoyulub və bu kameralar cinayətlərin aşkar edilməsi və cinayətkarları məsuliyyətə cəlb etmək üçün böyük rol oynayır. Hesab edirəm, həyətlərdə də təhlükəsizlik kameraları qoyulmalıdır ki, təhlükəsizlik tədbirləri daha yüksək səviyyədə təmin olunsun”.



Dövlət başçısının diqqət çəkdiyi məsələyə münasibət bildirən iqtisadçı-ekspert, sosioloq Elçin Bayramlı Prezidentin çox vacib bir problemə toxunduğunu və onun həlli üçün tapşırıqlar verdiyini deyib. Ekspert vurğulayıb ki, həqiqətən də “evlərarası həyətlərlə” bağlı vəziyyət yaxşı deyil:

“Şəxsi obyektlərin tikintisi üçün ictimai yerlər, həyətlər, hətta məktəblərin ərazisi tutulur. Bu hal sakinlər üçün problem yaratmaqdan əlavə həm də şəhər infrasturkturunu qəlizləşdirir və yükləyir. Bunun qarşısı alınmalıdır. Bakının infrastrukturu baş plana, tikinti normalarına uyğun qurulmalıdır. Binaların həyətlərinin kifayət qədər ərazisi, yaşıllıq sahəsi, uşaq meydançaları, idman qurğuları, avtomobil dayanacaqları olmalıdır. Səkilər obyektlərdən və onların irəli çıxarılmış pilləkənlərindən azad edilməlidir. Belə ictimai əraziləri zəbt edənlər və buna icazə verən məmurlar cəzalandırılmalı, həmin ərazilər sakinlərin istifadəsinə qaytarılmalıdır. Bu cəhətdən Bakıda vəziyyət xeyli pisdir. Paytaxtımız ərazi nisbətinə və əhali sayına görə ən az yaşıllıq olan şəhərlərdən biridir. Ona görə də, Bakıda yaşıllıq sahələrinin artırılması işi davamlı və genişmiqyaslı həyata keçirilməlidir”.

E.Bayramlının sözlərinə görə, təhlükəsizlik istiqamətində də müvafiq tədbirlər görülməlidir:

“Kameralar quraşdırılmalı, müəyyən məsafədən bir polis postu olmalıdır. Təhlükəsizlik kameraları oğurluğun və sair cinayətlərin qarşısını alır. Belə hallar baş verdikdə isə günahkarın tapılmasını asanlaşdırır. Bu yaxınlarda bizim binada bir uşağı oğurlamağa cəhd etmişdilər. Yaxınlıqda kamera olmadığından bu cəhdin kimlər tərəfindən törədildiyi barədə məlumat əldə etmək mümkün olmadı. Ümumiyyətlə, cənab Prezidentin məlum görüşdə bildirdiyi iradlar və verdiyi tapşırıqlar çox yerində və aktualdır. Əminəm ki, qeyd olunan sahələrdə vəziyyət tezliklə müsbətə doğru dəyişəcək”.

Paylaş

Bizi Facebookda izləyin
İsmayıl Qocayev Yazarın yazıları
menu
menu