Qaçqınlar üçün “Yol sənədi” – Onların xaricə getmələri asanlaşdı

Dövlət Miqrasiya Xidməti Azərbaycanda qaçqın statusu alan şəxslərə "Yol sənədi" təqdim edir. Dövlət Miqrasiya Xidmətinin rəisi Vüsal Hüseynov bildirib ki, həmin yol vərəqi ilə ölkədə yaşayan qaçqınlar beynəlxalq səfərlər edə biləcəklər:

"Keçən illə müqayisədə 11,4 min artım olub. Ölkəyə 3 milyon 170 min əcnəbi gəlib. Azərbaycanda qaçqın statusu alan vətəndaşlar bu vaxta qədər ölkədən kənara çıxmağa çətinlik çəkirdilər. Artıq bu sənədi alandan sonra həmin qaçqınlar istənilən ölkəyə gedə biləcəklər. "Yol sənədi"nin etibarlılıq müddəti 5 ildir. Əgər 5 il müddətində həmin qaçqınla bağlı nəsə problem olmazsa, o müraciət edib növbəti dəfə yol sənədi ala bilər”. 



Azər Allahverənov: “Yol sənədi” diplomatik durumlar tərəfindən tanınan və bütün ölkələrdə tam hüquqa malik olan sənəd kimi qiymətləndirilir”


"Yol sənədi" mühüm rola malik olduğunu deyən Dövlət Miqrasiya Xidməti (DMX) yanında İctimai Şuranın sədri Azər Allahverənov Sherg.az-a açıqlamasında bildirib ki, əvəllər qaçqınlarımız xarici ölkələrə asanlıqla gedə bilmirdilər. 

Onun sözlərinə görə, bu vəsiqə qaçqınlarımızın ölkənin hüdudları daxilində şəxsiyyətini təsdiq edən bir sənəddir:

“Beynəlxalq müstəviyə nəzər salsaq, beynəlxalq konvensiyalarda bir çox hüquqi sənədlərdə qeyd olunub ki, qaçqın statusu almış şəxslərin ölkələrarası rahat hərəkətini təmin edə biləcək imkanlar yaradılmalıdır. Yəni, insanların azad hərəkət etmək hüququ onlara verilir və bununla bağlı dövlət zəruri işləri həyata keçirir. 

Bu gün Azərbaycanda yaşayan qaçqınlar arasında elə bir qism var ki, onların övladları, qohumları xaricdə oxuyur. Nəticədə onlar mütəmadi olaraq xaricə getmək istəyirlər. Xaricdə təhsil almaq istəyənlərin və ya ölkəmizdə müəyyən sahədə işini qurub, amma biznesini inkişaf etdirmək üçün xarici əlaqələrə "Yol sənədi" vasitəsilə xaricə gedib sazişlər bağlayaraq biznesini inkişaf etdirə bilər. Yəni, “Yol sənədi” qaçqınlar üçün əlavə imkanlar da yaradır”.



A.Allahverənov vurğulayıb ki, bu gün DMX10 qaçqına “Yol sənədi” verib:

“Faktiki olaraq dövlətimiz həmin şəxslərə əlavə imkanlar yaradır ki, onlar öz istəklərinə uyğun olaraq xarici ölkələrə səfər etsinlər. Məsələn, turist kimi də hansısa ölkəyə gedə bilərlər. Təbii ki, Azərbaycanda olarkən onlar aidiyyəti üzrə getmək istədikləri ölkənin səfirliyinə də müraciət edə bilərlər. Çünki bəzi ölkələrə viza tələb olunur. Belə olduğu təqdirdə “Yol sənədi” diplomatik durumlar tərəfindən tanınan və bütün ölkələrdə tam hüquqa malik olan sənəd kimi qiymətləndirilir. Bu baxımdan yol sənədinin mühüm əhəmiyyəti var. Bu sənəd beynəlxalq standartlara cavab verir. Çox xoş bir hadisədir ki, sənəd qaçqın statusu alan şəxslərin xaricə getməsini sadələşdirib”.

Paylaş

Bizi Facebookda izləyin
Yeganə Bayramova Yazarın yazıları
menu
menu