Bizim xanımlar dözümlüdürlər, bağışlayırlar: Kişi də elə düşünür ki, döyüb, söyə, bilər

Son zamanlar  ölkədə qadına qarşı şiddət və zorakılıq faktları qarşısıalınmaz hal alıb. Təkcə ötən gün ərzində 2 qadın həyat yoldaşı tərəfindən amansızlıqla qətlə yetirilib, bir qadın isə şikəst qalıb. Hüquq mühafizə orqanlarından verilən məlumata görə, əvvəllər hərbi hissəni icazəsiz tərk etməkdə və fərarilikdə ittiham olunan Bakı şəhər sakini  Ziya Ələsgərov həyat yoldaşı Kristina Ələsgərovanı sinəsinə, qarnına və üzünə bir neçə bıçaq zərbəsi vurduqdan sonra qaçıb gizlənib.
 
Ağır vəziyyətdə olan zərərçəkən 3 saylı şəhər klinik xəstəxanasına yerləşdirilib.
Masallı rayonun Təzəkənd kənd sakini Ağayev Sərxan  Azayxan oğlu isə avtomatla yaşadığı evin həyətində həyat yoldaşı Nəbiyeva Alimə Əli qızını və eyni zamanda  qaynı Nəbiyev Miralimlə  qayınanası  Nəbiyeva Zemfiranı da  güllələyib.

Digər dəhşətli qətl hadisəsi isə Şirvan şəhərində törədilib. Kişi həyat yoldaşının boğazını kəsərək qətlə yetirib. Hadisə Sənaye zonasında baş verib. 1984-cü il təvəllüdlü Nağıyev Sahib İdris oğlu ailə-məişət münaqişəsi zəminində həyat yoldaşı - Zəngilan rayon sakini, 1986-cı il təvəllüdlü Nağıyeva Pərvanə Vaqif qızını yaşadıqları mənzilin yataq otağında qətlə yetirib.

O, həyat yoldaşını çarpayıda yatdığı halda boğaz nahiyəsinin əsas damarını bıçaqla kəsib. Çox qan itirən Pərvanə Nağıyeva hadisə yerində ölüb.
Pərvanə Nağıyeva 2 uşaq anası olub. Qətlin hansı səbəbdən baş verdiyi araşdırılır.

Ekspertlərin fikrincə, qadınlara qarşı  şiddətin artmasına səbəb, əsasən insanlarda olan mənəvi keyfiyyətlərin itirilməsi, ətrafda baş verən hər hala güclü emosional reaksiyanın verilməsi, hər kəsin sosial şəbəkələrdə daha çox vaxt keçirərək ailə dəyərlərini , ailə komfortunu arxa plana keçirməsidir.



İradə Cavadova: “Qadınlarımız ilk dəfə təhqirə və ya zorakılığa məruz qaldığı zaman hüquq mühafizə orqanlarına şikayət edib, təhlükəsizliyinə dair önləm almalıdır”


Vəkil İradə Cavadovanın "Şərq"ə açıqlamasına görə, ölkədə məişət zorakılığına qarşı mübarizənin hüquqi bazası mövcud olsa da, icra mexanizmi qənaətbəxş deyil:

"Zorakılığa məruz qalan qadınlar üçün krizis mərkəzləri olmalıdır. Qanunla yanaşı bu cür mərkəzlərin fəaliyyət göstərməsi qadın haqlarının qorunmasını daha da təkmilləşdirəcək. Düzdür, şiddətə məruz qalan qadınlar  hüquq mühafizə  orqanları tərəfindən müdafiə olunur. Amma problemlər də qalmaqdadır". 

Hüquq müdafiəçisinin sözlərinə görə, cinayət törədən kişilər  birdən- birə həyat yoldaşlarını öldürmək qərarı vermirlər: 

"Bizim xanımlar dözümlüdürlər, bir neçə dəfə bağışlayırlar. Belə olanda kişi elə düşünür ki, onu döyə, söyə bilər, onsuz da qadın susacaq. Çox güman ki, baş verən cinayət hadisələrindən əvvəl zorakılıq əlamətləri, təhqir faktları olub. Qadınlarımız ilk dəfə təhqirə və ya zorakılığa məruz qaldığı zaman hüquq mühafizə orqanlarına şikayət edib, təhlükəsizliyinə dair önləm almalıdır. Bəzi qadınlarımız "eldən ayıb" edir, şikayət edən xanımlara isə məsələnizi ailə daxilində həll edin deyib, yola salırlar. Halbuki, qadının ilk şikayətində onun ərinin psixoloji durumu müəyyənləşdirilməlidir. 

Son vaxtlar qadınlara qarşı şiddət faktlarının artmasının ciddi narahatlıq doğurduğunu vurğulayan hüquq müdafiəçisi hesab edir ki, ölkədə qanunvericilik bazasının və cəza mexanizminin olmasına rəğmən baş verən cinayət hadisələrinin sayı artır. Hesab edirəm ki, məişət zorakılığına qarşı mübarizə çərçivəsində profilaktik tədbirlər görülməli, problemləri ailələr müəyyənləşdirilib insanların psixolojik durumu müəyyənləşdirilməlidir. Kütləvi informasiya vasitələrində maarifləndirmə işləri daha da gücləndirilməlidir".

Paylaş

Bizi Facebookda izləyin
Şəymən Bayramova Yazarın yazıları
menu
menu