"Vahid jurnalist vəsiqələri olsa, saxtakarların meydanı daralar" - Elçin Mirzəbəyli 

 Məlum olduğu ki, karantin rejimində peşə sahiblərinin, o cümlədən jurnalistlərin sərbəst hərəkətinə icazə verilib. Bununla əlaqədar olaraq, deyəsən, son vaxtlar çoxları "jurnalist olmaq" eşqinə düşüblər. Belə ki, Nərimanov rayonunda xüsusi karantin qaydalarına zidd olaraq fəaliyyət göstərən protez saçların qoyulduğu salon aşkar edilib.

Həyata keçirilən tədbir zamanı A.M.Cümə küçəsində yerləşən paytaxt sakini Məmmədov Ağa Mübariz oğluna məxsus “HDC Baku” mərkəzinin qanunsuz olaraq karantin dövründə işlədiyi məlum olub. Obyektə baxış zamanı oranın sahibi, işçiləri və 1 nəfər müştəri Polis Şöbəsinə gətiriliblər.

Protez saç mərkəzinin rəhbəri Ağa Məmmədovun üzərinə baxış zamanı ondan jurnalist vəsiqəsi aşkar edilib. O, əvvəlcə bu vəsiqədən istifadə edərək məsuliyyətdən yayınmağa çalışsa da sonradan karantin qaydalarını pozduğunu etiraf edib.

 Bu, o deməkdir ki, belə şəxslər öz əməlləri ilə təkcə qanunu pozmur, həm media nümayəndələrinin əməyinə kölgə salırlar.

Məsələ ilə bağlı "Sherg.az"a münasibət bildirən "Xalq cəbhəsi" qəzetinin baş redaktoru Elçin Mirzəbəyli bu insanların məsuliyyətə cəlb olunmasını tələb edir:

"Saxta sənəd hazırlamaq cinayət əməli törətmək üçün vasitədir. Həmin adamlar medianın imicinə zərbə vurmurlar. Bunu bacarmazlar. Həm də kiminsə saxtakarlıq əməlinə görə media məsuliyyət daşımır.  Amma onlar özlərini, gələcəklərini təhlükə altına salırlar. Maarifləndirmə, ya da ictimai qınaqla belələrini tutduqları yoldan çəkindirmək olmaz. Yeganə çarə hüquqi tənzimlənmədir. Yəni əməli törədən ona adekvat formada məsuliyyətə cəlb olunmalıdır".

 E. Mirzəbəyli problemin həlli yolundan da danışdı: "Vahid jurnalist vəsiqələri olmalıdır. Bu halda saxtakarların meydanı daralar. Həm də reketçilərin sayı azalar. Avropada belə təcrübə var. İnanıram ki, biz də tətbiq edə bilərik və etməliyik".
                                       

Paylaş

Bizi Facebookda izləyin
Kənan Novruzov Yazarın yazıları
menu
menu