Nə maska taxan var, nə də məsafə qoruyan ! - "Pandemiyanın ikinci dalğası qaçılmazdır !”

Vüqar Cavadzadə: “Operativ Qərargahın qərar və qaydalarına tam əməl etmək  mütləqdir"



Son günlər  Azərbaycanda   koronavirus infeksiyasına yoluxma faktlarında ciddi artım müşahidə edilir.  2-3 gündə xəstələnənlərin sayı sağalanların sayından çox olub. Bu isə aidiyyəti şəxsləri ciddi narahat edir. 
Qeyd edək ki, indiyədək Azərbaycanda koronavirusa yoluxanların sayı 2279 olub, onlardan 1576 nəfər müalicə olunaraq sağalıb, 28 nəfər vəfat edib.
Rəsmi məlumata görə, hazırda 675 nəfərin xüsusi rejimli xəstəxanalarda Covid-19 xəstəliyindən müalicəsi davam etdirilir. Həmin şəxslərdən 28 nəfərin vəziyyəti ağır, digərlərinin səhhəti stabil qiymətləndirilir.

Həkimlər də hesab edir ki, epidemioloji vəziyyətin mənfiyə doğru dəyişməsi karantin rejiminin ciddi şəkildə pozulması ilə əlaqədardır.
Karantin rejimi yumşaldıqdan sonra daha çox insan fərdi mühafizə qaydalarına məhəl qoymadan küçələrə çıxmağa başladı. Vətəndaşlar artıq sosial məsafəyə riayət etmirlər və tibbi maskalar taxmırlar. Hökumət xəstəliyin yayılması ilə mübarizə üçün bütün tədbirləri gördü, indi vətəndaşlar məsuliyyətli olmalı və karantin tədbirlərinə ciddi riayət etməlidirlər.

Həkim- infeksionist Vüqar Cavadzadə    yoluxma faktlarının artmasını  birmənalı olaraq əhalinin karantin qaydalarına riayət etməməsi ilə əlaqələndirib. Onun sözlərinə görə, vətəndaşların virusu ciddiyə almaması, hətta  xüsusi karantin rejiminə  laqeyd münasibəti yoluxma faklarının artmasına gətirib çıxardı: 

"Ya insanlar bu pandemiyanın nə dərəcədə təhlükəli olduğunu anlamır, ya da anlamaq istəmir. Düşünürəm ki,  karantin tədbirləri ilə bağlı son xəbərdarlıqlar və ikinci dalğa riskinin qaçılmaz olması insanlarımızı daha məsuliyyətli olmağa vadar edəcək və növbəti günlərdə yoluxma sayı azalacaq. Koronavirus infeksiyasının qlobal pandemiya elan olunduğunu və virusun geniş yayılma tendensiyasının davam etdiyini nəzərə alaraq, bir daha vətəndaşlarımızı diqqətli olmağa çağırıram.
Əhalinin sağlamlığının etibarlı qorunması və təhlükəsizliyinin təmin edilməsi məqsədilə Operativ Qərargahın qərar və qaydalarına tam əməl etmək  mütləqdir".

Paylaş

Bizi Facebookda izləyin
Şəymən Bayramova Yazarın yazıları
menu
menu