“Həkimlərimiz pandemiya ilə inamla mübarizə aparırlar” - Deputat 

“Elə tibb işçilərimiz var ki, aylardır evlərinə getmirlər, ailələrindən, övladlarından ayrı düşüblər”

“Cənab Prezident İlham Əliyev və Birinci vitse-prezident Mehriban xanım Əliyeva həkimlərin bu fədakarlığını yüksək qiymətləndirirlər”




“Bu gün bütün dünyada olduğu kimi, Azərbaycanda da koronavirus pandemiyası ilə mübarizənin ön cərgəsində həkimlər dayanır. Həkimlərimiz virusla mübarizədə böyük qəhrəmanlıq və fədakarlıq göstərirlər. Xalqımız onların bu xidmətini heç vaxt unutmayacaq”.

Bunu “Sherg.az”a açıqlamasında Milli Məclisin Səhiyyə komitəsinin üzvü, deputat Ülvi Quliyev deyib.

O qeyd edib ki, pandemiya Azərbaycan tarixinin ən ağır hadisələrindən biridir: 

“Bu ağır mübarizənin yükü həkimlərin çiyinlərindədir. Dünyada pandemiya yeni yayılmağa başlayanda Azərbaycan həkimləri tam səfərbər oldular. Həmin dövrdə ölkəmizdə infeksiya çox yayılmamışdı. Sərt karantin rejimi yumşaldılandan sonra Azərbaycanda koronavirusa yoluxanların sayının artmasına baxmayaraq, vəziyyət nəzarət altındadır. Bu da dövlətin vaxtında gördüyü tədbirlərin və həkimlərin əməyinin nəticəsidir”.

Ü.Quliyev bildirib ki, bu gün peşə bayramlarını qeyd edən həkimlər bütün çətinliklərə baxmayaraq, pandemiya ilə inamla mübarizə aparırlar: 

“Elə həkimlərimiz var ki, aylardır evlərinə getmirlər, ailələrindən, övladlarından ayrı düşüblər. Hətta tibb işçilərindən də koronavirusa yoluxanlar, dünyasını dəyişənlər var. Həkimlər öz həyatlarını təhlükəyə ataraq, insanlarımızı dəhşətli virusdan qorumaq, yoluxanları sağaltmaq üçün əllərindən gələni edirlər. Cənab Prezident İlham Əliyev və Birinci vitse-prezident Mehriban xanım Əliyeva həkimlərin bu fədakarlığını yüksək qiymətləndirirlər. Ümumilikdə dövlətimiz tibbi işçilərinə diqqət və qayğı ilə yanaşır”.

Deputat bildirib ki, Azərbaycanda hər zaman həkim sənətinə böyük maraq olub, həkimlərə hörmətlə yanaşılıb:

“Pandemiya dövründə göstərdikləri qəhrəmanlıqlar həkimlərə bu hörmətin əsassız olmadığını təsdiqlədi”.

Paylaş

Bizi Facebookda izləyin
Yeganə Bayramova Yazarın yazıları
menu
menu