"Ümid edirəm, yaxın zamanda yoluxma sayı sıfıra bərabər olacaq" - Gənc fəal   

"Dünyanı cənginə almış COVİD-19 pandemiyasına qarşı hər bir ölkə müxtəlif üsullarla virusla mübarizə aparmaqdadır".
Bunu "Sherg.az"a YAP Səbail rayon təşkilatının Gənclər Birliyinin sədr müavini Fuad Heydər deyib.

Gənc fəal bildirib ki, əksər ölkənin iqtisadiyyatı ziyana uğrayıb, bir sıra ölkənin əhalisi gözlə görünəcək qədər azalıb. Lakin bəzi ölkələr virusa qarşı vaxtında mübarizəyə başlaya bilib:

"Azərbaycan məhz bu sıradakı ölkələrə aiddir. Virus digər ölkələrdə sürətlə yayıldığı zaman biz sərhədləri bağladıq. Digər ölkələrə nisbətən virusun ölkəmizdə yayılması ləngidi. Prezidentimizin düzgün siyasəti, uzaqgörənliyinin nəticəsidir ki, hazırda 46 xəstəxana koronavirusun müalicəsi üçün istifadəyə verilib. Bu xəstəxanaların hər biri yüksək texnika və avadanlıqlarla təchiz olunub. Virusdan qorunmaq üçün qabaqlayıcı tədbirlər görülüb".

F.Heydər xatırladıb ki, Prezidentimizin iştirakı ilə Sumqayıt Kimya Sənaye Parkında “Bakı Tekstil Fabriki” MMC tərəfindən yaradılan tibbi maska istehsalı müəssisəsi açılıb:

"Müəssisədə hər gün 120 min tibbi maska istehsal edilir. Əhalimizin sağlamlığı üçün maska istehsalı günü-gündən artır. Koronavirusdan qorunmaq üçün tibbi heyətin istifadəsi məqsədilə 3D printerlərlə çap olunan “üz sipəri” maskası və bir çox tibbi cihaz və avadanlıqların müxtəlif detallarının sınaq istehsalına başlanılıb. Ölkədə 6 şirkət dezinfeksiyaedici məhlullar istehsal edir. Göründüyü kimi Prezidentimiz dəstəyini xalqından əsirgəmir. Xalq da daim öz Prezidentinə dəstək olmalıdır və olmaqdadır. Gündən-günə virusa yoluxanların sayının azalması Respublikamızda gedən güclü mübarizə tədbirlərinin nəticəsidir. Ölkəmizdə gün ərzində rekord yoluxma sayı 590 nəfərə yüksəldiyi halda artıq yüz nəfərdən aşağı düşüb. Ümid edirəm, yaxın zamanda bu rəqəm 0-a bərabər olacaq və ölkəmiz bu bəladan birdəfəlik qurtulacaq".

Paylaş

Bütün xəbərlər Facebook Telegram kanalında
İsmayıl Qocayev Yazarın yazıları
menu
menu