Professorun kövrələrək söylədiyi fikrə SÖZARDI: “Onu ilk dəfə mən demişəm”

Qulu Məhərrəmli: “Hesab edirəm ki, “Koroğlu” uvertürası musiqi dili ilə Azərbaycan Xalq  Cümhuriyyətinin hekayətidir”

 Nəsiman Yaqublu: “4-5 il əvvəl demişdim ki, “Koroğlu” uvertürası Ü.Hacıbəylinin parlamentin açılışından vəcdə gələrək yazdığı əsərdir”

Ü.Hacıbəylinin parlamentin açılışından hazırladığı “Təəssürat” reportajındakı ruh, coşqu uvertürada da var”


“Hesab edirəm ki, “Koroğlu” uvertürası musiqi dili ilə Azərbaycan Xalq  Cümhuriyyətinin hekayətidir. Mən bilirəm ki, Rəsulzadə onu duyub”.
Bu sözləri professor Qulu Məhərrəmli Murad Arifin aparıcısı olduğu “Popumuz var” verilişində deyib. Tamaşaçılar verilişin məhz bu epizodunu böyük maraqla qarşılayıblar. Professorun bir anlıq tutulması və kövrəlməsi də diqqətlərdən yayınmayıb. Deməli, bizə müstəqilliyin dadını yaşadan, AXC banisi Məhəmməd Əmin Rəsulzadə qəlblərdə yaşayır və yaşayacaq. 


 Q.Məhərrəmlinin “Koroğlu” uverturası barədə fikirləri isə müzakirələrə səbəb olub. Tədqiqatçı, professor Nəsiman Yaqublu “Sherg.az”a açıqlamasında deyilənləri şərh edib: 

“Rəsulzadənin “Koroğlu” operasını necə sevdiyini və onu nə qədər həvəslə dinlədiyini ilk dəfə mən demişəm. Hələ 1991-ci ildən nəşr olunan “Məhəmməd Əmin Rəsulzadə” kitabında bu barədə yazmışam. 80-90-cı illərdə onun silahdaşları ilə görüşdən, söhbət və araşdırmalardan sonra bu qənaətə gəlmişəm”. 

 N.Yaqublu “Koroğlu” uvertürasının müəllifi Üzeyir bəy Hacıbəylinin cümhuriyyət sevgisindən də danışıb: 

“O, Azərbaycan cümhuriyyətinə çox bağlı adam idi. “Azərbaycan” qəzetində əlamətdar hadisə, yəni müstəqillik haqqında yazdığı xeyli məqaləsi var. Parlamentin açılışından hazırladığı “Təəssürat” reportajı da bu qəbildəndir.

4-5 il əvvəl demişdim ki, “Koroğlu” uvertürası Ü.Hacıbəylinin parlamentin açılışından vəcdə gələrək yazdığı əsərdir. Dediyim kimi, “Təəssürat” məqaləsi parlamentin açılışı haqqındadır. Müəllif hadisələri o qədər həyəcanla təsvir edir ki...

O, yazır: “...Parlamentimiz açıldı. Baxdıq gördük ki, Fətəli xan doğru deyir. Yatsa idik yuxumuza da girməzdi. Parlament binasının içərisində olan gözəllik yerə sərilən xalçalarda, onların qiymətində deyil, bəlkə də, o xalçalardan qiymətcə ucuz olan, amma məna və məzmunca baha olan üçrəngli bayraqlarımızda idi...”.

Görürsünüz, necə təsirli sözlərdir. Üzeyir bəy yazır ki, insanlar ayağa qalxıb, üçrəngli bayrağı salamlayanda başımdakı tüklər biz-biz oldu. Bax, reportajdakı həmin ruh, coşqu uvertürada da var. Əgər reportajı oxuduğunuz dəqiqələrdə, uvertüraya da qulaq assanız görərsiniz ki, emosiyalar, hisslər üst-üstə düşür”.

Paylaş

Bizi Facebookda izləyin
Kənan Novruzov Yazarın yazıları
menu
menu