“Qadınlara Gender Əsaslı İqtisadi Dəstək” layihəsinin icrasına başlanılıb





13-14 may tarixlərində Füzuli rayonunda "Qadınlara Gender Əsaslı İqtisadi Dəstək” layihəsinin başlanmasına dair görüşlər keçirilib. Layihə Sosial Tərəqqi İctimai Birliyi (STİB) Avropa İttifaqının maliyyələşdirdiyi və BMT-nin İnkişaf Proqramının qismən maliyyələşdirdiyi və icra etdiyi "Genderə - həssas Dayanıqlı İnkişaf Məqsədlərinin Həyata Keçirilməsində Vətəndaş Cəmiyyətinin Rolunun Artırılması” layihəsi çərçivəsində həyata keçirilir.

İlk məlumatlandırma görüşü məcburi köçkünlər üçün inşa edilmiş Zobucuk qəsəbələrinin, ikinci görüş isə Qayıdış və Fin evləri qəsəbələrinin sakinləri və nümayəndələri üçün keçirilib. Bu görüşlərdə Füzuli rayon İcra Hakimiyyətinin nümayəndələri, qəsəbələr üzrə bələdiyyə üzvləri, qəsəbə icra nümayəndələri, Kiçik və Orta Biznesin İnkişaf Agentliyinin (KOB) Füzuli rayon üzrə nümayəndəsi, fəal qadınlar iştirak ediblər.

STİB-in layihə meneceri Əşrəf Mirzəzadə layihənin qısa təqdimatını edərək bildirib ki, layihənin məqsədi Azərbaycan respublikasının Füzuli rayonunda inşa edilmiş 17 məcburi köçkün qəsəbələrində, xüsusilə qadınlar və gənc nəsil arasında gender məsələləri üzrə maarifləndirilmə tədbirlərinin təşkili və keçirilməsidir. Layihənin 2 komponent üzrə həyata keçiriləcəyini qeyd edən Ə. Mirzəzadə bildirib ki, birinci komponent interaktiv təlimlər, ikinci komponent isə MK qadınlara gəlir gətirən bizneslərin yaradılması üçün texniki və maliyyə dəstəyi ilə təmin edilməsi şəklində olacaq. Nəticədə qadınlar tərəfindən idarə olunacaq MMC-lər yaradılacaq.

Görüşlərdə söz alan KOBİA-nın nümayəndəsi Hafiz Sadıqov qeyd edib ki, Füzuli rayonu ərazisində belə bir layihənin icra olunması çox təqdirəlayiqdir və bu qadınlar arasında sahibkarlığa marağın artmasına böyük təkan verəcək. Bununla yanaşı H. Sadıqov layihə nəticəsində yaranacaq sahibkarlıq subyektlərinə KOBİA tərəfindən lazımi dəstək göstəriləcəyini deyib.

Görüşlərdə iştirak edən Füzuli rayon İH-nin Sosial-İqtisadi məsələlər üzrə müavini Süleyman Əliyev bildirib ki, bu layihə MK qəsəbələrində məskunlaşmış qadınların sosial-iqtisadi inteqrasiyasına çox müsbət təsir edəcəkdir və onların cəmiyyətdə daha fəal olmaqlarına şərait yaradacaq.
Hər iki görüşün sonunda müzakirələr aparılıb, iştirakçıların sualları cavablandırılıb və təkliflər dinlənilib.

Paylaş

Bizi Facebookda izləyin
menu
menu