"Təbii ki, işbirliyinə başlarkən müəyyən məsləhətlər, şərtləri dilə gətiririk"
Şou-biznesin durğun dönəmində klip təqdimatları, yeni layihələrlə media qarşısına çıxanlar az olur. Ötən gün bir çox müğənnilərin səhnəyə gəlişinə imza atan rejissor, klipmeyker Rəhman Əliyev yeni projelərini jurnalistlərin müzakirəsinə çıxartdı. O, görüşə bir gündə iki maraqlı kliplə gəlmişdi. Bu dəfə tanınmış klipmeyker Rusiyada yaşayan azərbaycanlı musiqiçi ilə işbirliyinə başlayıb. Bəstəkar Ramilla Nağıyeva ilə çalışan klipmeyker bəstəkarın bəstələrindən birinə ekran həyatı verib.
Əvəz Muradov kompazisiyanın aranjimanını həyata keçirib. Kompazisiyanın aranjimanı fərqli və maraqlı göründüyü üçün jurnalistlərin diqqətini çəkə bildi. «Yanlış addım» adlı klip təqdim olunduqdan sonra media suallarını ünvanladı. «Azərbaycan şou-biznesindən nə qədər xəbəriniz var? "Bizim şou-biznes Rusiyadakılara qətiyyən bənzəmir" sualına isə bəstəkar Ramilla xanım belə cavab verdi: «Mən biznes məqsədi ilə Azərbaycana gəlməmişəm və bəstələrimə klip çəkdirərkən maddi umacağı nəzərə almıram. Sadəcə mən musiqiyə bağlı bir insanam. Yaradıcı insan olduğum üçün də bəstələrimi ekran işində də görmək istədim. Azərbaycan şou-biznesini yaxından izləmirəm, amma kənardan az da olsa məlumatım var. Sadəcə mən o bazara girməyi düşünmədiyim üçün buranın qaydaları mənim üçün o qədər maraqlı deyil. Mən bəstələrimi yazıram, bu mənimçün önəmlidir. Rəhman müəllimlə işbirliyinə başlamışam. Təbii ki, onun məsləhətlərini dinləyirəm. Bu gün də onun əməyi sayəsində sizlərin qarşısına çıxmaq fürsətim yarandı. Hər birinizə təşəkkür edirəm. Layihə rəhbəri Rəhman Əliyevə ünvanlanan suallar çox olsa da, bir neçə məqam xüsusi vurğulandı. Adətən işlədiyi müğənnilərə, sənətçilərə müəyyən qadağalar qoyan layihə rəhbəri Ramilla xanıma da bu qadağaları tətbiq etməyi düşünürmü? Rəhman Əliyev sualımıza belə cavab verdi: Mənim öz iş prinsipim var. Təbii ki, işbirliyinə başlarkən müəyyən məsləhətlər, şərtləri dilə gətiririk. Əgər o şərtlər mənə müraciət edən sənətçini qane edirsə, işbirliyimiz alınır. Qadağalar deməzdim, ancaq qarşılıqlı anlaşmamız olub».
Təqdimat mərasimində Nurlan Növrəslinin ifasında «Duysun dünya» adlanan mahnıya çəkilən klip də nümayiş edildi. Mahnının musiqisi Ramilla Nağıyevaya məxsus idi. Təbii ki, sözügedən klipin də rejissoru Rəhman Əliyev idi. Mahnının aranjimanı Elvin Musayevə məxsus idi. Klip təqdim olunduqdan sonra Nurlan Növrəsli sualları cavablandırdı. Nurlanın ifa etdiyi mahnını Türkiyənin meqastarı Tarkanın repertuarına bənzədənlər də oldu. Nurlan Növrəsli «Mahnıların bəzən bənzərliyi olur. Bu həm də tərz ilə bağlıdır. Tarkanın tərzinə yaxın bir bəstəyə müraciət etsəm də, mən onu Nurlan Növrəsli olaraq ifa etmişəm. Qaldı digər tərəfdən Tarkan meqa stardı, ona bənzətdilərsə, mən buna sevinirəm, əsas odur ki, mənim ifamı, tərzimi Azərbaycan toylarında oxuyanlara bənzətmirlər».
Təqdimatın sonunda səbəbkarlar üçün hazırlanan tort kəsildi, xatirə şəkilləri çəkildi.
