"İqtidar hər kəsə barışıq təklif edir"

«Konstruktiv danışıqlara hazır olmayan bəzi qüvvələrin bu jesti dəyərləndirə bilməməsi onların öz problemi sayılmalıdır”


Azərbaycanda siyasi partiyalar arasında dialoq davam edir. İyulun 7-də Milli Məclisdə təmsil olunan siyasi təşkilat sədrlərinin iştirakı ilə videokonfrans formatında görüş keçirilib. Görüşdə Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyev də iştirak edib. 
Videokonfrans olduqca aktual bir mövzuya - “Azərbaycanda yeni siyasi konfiqurasiya: Pandemiya dövrü və yeni çağırışlar” mövzusuna həsr edilib. Pandemiya dövründə meydana çıxan yeni çağırışlar fonunda siyasi sistemin əsas elementləri sayılan partiyaların fəaliyyəti müzakirə olunub.



Dialoqla bağlı “Sherg.az”a danışan millət vəkili Anar Məmmədov bildirib ki, siyasi dialoq mühitinin yaradılması üçün cənab Prezidentin tapşırıqları əsasında addımlar atılır. Parlament üzvünün sözlərinə görə,  Prezident problemləri həll etmək istəyir və açıq bəyan edir ki, heç bir kənar qüvvə Azərbaycana təzyiq edə bilməz:

“Problemlər ölkə daxilində öz həllini tapmalıdır. Hakimiyyət bütün məsələlərdə dialoqa və müzakirələrə hazırdır. İqtidar ölkə daxilində hər kəsə barışıq təklif edir. Zənnimcə, konstruktiv danışıqlara hazır olmayan bəzi qüvvələrin bu jesti dəyərləndirə bilməməsi onların öz problemi sayılmalıdır”.

Millət vəkili, vurğulayıb ki, Prezidentin VI çağırış Milli Məclisin ilk iclasında nitqi bir növ son dövrdə ölkədə aparılan ciddi islahatlara verilən dəyərləndirmə idi:

“Həmin iclasda Prezident parlamentin rəhbərliyində həm bitərəflər, həm də azlıqda olan partiyaların nümayəndələrinin təmsil olunduğunu bildirib. Bitərəflər və azlıqda olan partiyaların nümayəndələri də Milli Məclisin daimi komitələrinə sədr seçildilər. Nəticədə ayrı-ayrı partiyaların nümayəndələrinin Milli Məclisin və komitələrinin rəhbərliyində təmsil olunması siyasi sistemin möhkəmləndirilməsi və sağlam zəmində inkişaf etdirilməsi məqsədi daşıyır”.

Parlamentari qeyd edib ki, siyasi partiya sədrlərinin iştirakı ilə videokonfrans formatında görüş Azərbaycanda hakimiyyətlə müxalifət arasındakı münasibətlərin yeni müstəviyə çıxmasına imkan verəcək:

“Müharibə şəraitində olan bir dövlətdə Azərbaycanın güclənməsinə, hər hansı bir xarici təsirə qarşı vahid mövqedən çıxış etməsinə şərait yaranacaq. Görüşdə Milli Məclisin Sədri Sahibə Qafarovanın qeyd etdiyi kimi Prezident İlham Əliyevin  təşəbbüsü və rəhbərliyi ilə həyata keçirilən siyasi islahatlar vacibdir. Bu islahatlar bütövlükdə ölkədə yeni dialoq və əməkdaşlıq mühiti yaranmasına xidmət edir. Prezident Administrasiyasının şöbə müdiri Ədalət Vəliyev isə ölkəmizdə iqtidar və müxalifət arasında milli maraqlar naminə indiyədək müşahidə edilməyən yaxınlaşma və sağlam əməkdaşlıq şəraiti meydana gəldiyini diqqətə çatdırdı”. 

A.Məmmədov bildirib ki, belə görüşlərin keçirilməsi Azərbaycanda vətəndaş həmrəyliyi və birliyinin daha da  möhkəmləndirilməsinə, ölkəmizin davamlı inkişafına xidmət  edir:

“Görüşün sonunda siyasi partiyalar adından bəyanatın qəbul edilməsi pandemiya şəraitində müxalifət və iqtidar arasında dialoq və əməkdaşlıq mühitinin daha da genişlənməsindən xəbər verir. Düşünürəm ki, siyasi partiyalar arasında müntəzəm dialoq mühitinin qurulması dövlətçiliyimiz naminə Azərbaycanda yeni siyasi konfiqurasiyasının formalaşmasına müsbət təsir edəcək.

Ölkəmizdə çoxpartiyalı sistemin daha da möhkəm əsaslar üzərində qurulması üçün Milli Məclis tərəfindən lazımi addımlar atılacaq”.