Deputat Kür və Arazın qurumasından DANIŞDI: "Hər il problem yaşanır"


Bu məsələ əhalinin su ehtiyatının olmaması problemini aktuallaşdırıb  


Tahir Kərimli: “Kürdəmir, Salyan və Neftçalada su anbarı tikmək lazımdır" 



Son aylar Kür çayında suyun səviyyəsinin  kəskin azalmasına dair müzakirələr bitmir. Su səviyyəsinin aşağı düşməsi çayətrafı rayonlarda içməli su problemi yaradıb.
Qeyd edək ki, Azərbaycanda su resursu 32 milyard kubmetrdir. Bunun 70 faizi qonşu ölkələrdən gələn suyun hesabına, 30 faizi isə ölkə daxilində formalaşır. Kür və Araz çayları öz mənbəyini dağlara yağan yağışlardan, əriyən qar və buzlaqların sularından alır.  Reallıq isə budur ki, qlobal istiləşmə nəticəsində regionda qar yağması halları azalıb. Əlbəttə, su heç vaxt yoxa çıxmır, təbiətdə dövr edir. Lakin Kür çayının quruması artıq əhalinin su ehtiyatının olmaması problemini aktuallaşdırıb.  

Bəs çıxış yolu nədir?

Mövcud durumu "Sherg.az"a dəyərləndirən millət vəkili Tahir Kərimli bildirib ki, bəzi mütəxəssislər Kür çayının qurumasını yağıntların olmaması ilə əlaqələndirirlər.  Amma bu belə deyil. Deputatın fikrincə, əslində hər il belə problem yaşanır. Builki yağıntıların miqdarı əvvəlkilərdən fərqlənmir:



"Məlumdur ki, Xəzər dənizinin ümumi su ehtiyatının 60 faizi Volqa çayı vasitəsilə ödənir. Volqa çayı təxminən 1 il müddətinə axdıqca Kürün səviyyəsi qalxır. Hər zaman, tarix boyu belə hallar olub. Hətta Kürün səviyyəsi 2 metrə qədər enib və qalxıb. İndiki vəziyyətdə Xəzər dənizinin su səviyyəsinin qalxması ona səbəb olub ki, Kürün deltasında sular çay yatağına daxil olsun".

Parlament üzvü vurğulayıb ki, əvvəllər də bu aylarda Kür və Araz çaylarında suyun azalması müşahidə olunub:

"Xüsusən Sabirabadda Kür çayı qovuşağında müşahidə aparsaq görərik ki, hər iki çayın birləşdiyi yerdə, suyun səviyyəsində xeyli enmə var. Problem adətən Mingəçevir Su Elektrik Stansiyası (SES) vasitəsilə həll olunurdu. Lakin indi SES-in yenidən qurulması çətinlik yaradıb. Bir çox təcrübələr göstərir ki, problemin həlli üçün 3 kilometrdən bir anbarlar yaradılır. Hesab edirəm ki, yaranan çatışmazlığı aradan qaldırmaq üçün Kürdəmirdə Mollakənddə böyük su anbarı yaratmaq olar. Yaxud da Kürdəmir, Salyan və Neftçala ərazisində ən azı 1 su anbarı tikmək lazımdır".