Tramp ABŞ-ın "Oracle" şirkətinə "TikTok"u almağa razılıq verib


ABŞ prezidenti Donald Tramp “TikTok” sosial xidmətinin Amerikanın “Oracle” şirkəti tərəfindən satın alınmasına razılıq verib.

APA xəbər verir ki, bunu amerikalı lider “Fox News” telekanalında yayımlanan çıxışı zamanı bildirib.

“Mən bu sövdələşməyə öz xeyir-duamı verdim. Sövdələşmə iştirakçıları bu işi sona çatdırsalar, yaxşı olardı. Bu baş verməsə də, hər şey yaxşı olacaq… Bunun Çinlə heç bir əlaqəsi yoxdur, bu, tamamilə təhlükəsizdir”, - Tramp belə deyib.

Qeyd edək ki, 20 sentyabrdan etibarən ABŞ-da Çinin “TikTok” və “WeChat” sosial şəbəkələrini yükləmək mümkün olmayacaq.

Xatırladaq ki, ölkə rəsmiləri 15 sentyabr tarixinə qədər sosial şəbəkənin Amerika şirkətləri tərəfindən satın alınmayacağı təqdirdə, “TikTok”u ABŞ-da bloklamağa qərar veriblər. ABŞ kəşfiyyat agentlikləri iddia edir ki, sosial şəbəkə rəhbərliyi istifadəçilərin şəxsi məlumatlarını Çin hökumətinə ötürür və əks-təbliğatla məşğuldur. “Reuters” agentliyinin yazdığına görə, Çin tərəfi “TikTok” tətbiqinin ABŞ bölməsini Amerika şirkətlərindən birinə satmaqdansa, onu bağlamağı düşünür.