Ermənistan məcburdur !- “Qazaxın kəndləri də geri qaytarılacaq və...”

“Naxçıvan vasitəsilə Türkiyə ilə Azərbaycanın  quru yolu təmin olunur”

"Qazax rayonu kəndlərinin qaytarılması ölkəmizin üçün böyük bir irəliləyişdir"


“İşğal altındakı torpaqların və Qarabağın bütünlüklə işğaldan azad edilməsi ilə əlaqədar qardaşım, dostum İlham Əliyev başda olmaqla, bütün azərbaycanlı qardaşlarımı təbrik edirəm”.
Bunu Türkiyə Prezidenti Rəcəb Tayyib Ərdoğan bildirib.

Türkiyə Prezidenti deyib ki, imzalanan anlaşmaya əsasən, azad edilməmiş Azərbaycan torpaqları da Azərbaycana veriləcək:
“Anlaşmaya əsasən, Ermənistan Kəlbəcəri 15 noyabra, Ağdam və Qazaxın işğal altındakı hissələrini 20 noyabra, Laçını isə 1 dekabra qədər Azərbaycana təhvil verəcək. Azərbaycanla Naxçıvan Muxtar Respublikası arasında nəqliyyat əlaqəsi təmin ediləcək və bu məqsədlə bir yol inşa olunacaq. Eyni zamanda Ermənistanla Xankəndi arasında da bir nəqliyyat dəhlizi açılacaq. İşğal nəticəsində torpaqlarından çıxarılan azərbaycanlılar BMT-nin Qaçqınlar üzrə Ali Komissarlığının müşahidəsi altında torpaqlarına dönəcək”.



Türkiyə Prezidentinin açıqlamasını “Sherg.az”a şərh edən millət vəkili Tahir Kərimli bildirib ki, Naxçıvanla Qərb rayonlarımızın birləşdirilməsi üçtərəfli bəyanatın tələblərindən biridir.  Deputatın sözlərinə görə, Naxçıvan vasitəsilə Türkiyə və Azərbaycanın  quru yolu təmin olunur:

“Bu, çox vacib məsələdir və artıq qəti şəkildə razılaşdırılıb. İndiki durumda Rusiya Azərbaycanın dövlət müstəqilliyini tamamilə tanıyır. Şübhəsiz ki, işğalda olan Qazaxın kəndləri də geri qaytarılacaq. Məğlub olan Ermənistan bunu etməyə məcburdur. Əks təqdirdə başqa nəticələrlə üzləşə bilərlər. Ona görə də gec-tez qaydalara əməl etməlidir”.

Parlament üzvü hesab edir ki, Qazax rayonu kəndlərinin qaytarılması ölkəmizin üçün böyük bir irəliləyişdir:

“Azərbaycanın bütün ərazisi üzərində suverenlik haqqı var. Bu sahədə Türkiyə Prezidenti cənab Ərdoğanın rolu da yüksək qiymətləndirilməlidir. Türkiyə olmasaydı, çoxları Qarabağla bağlı məsələyə müdaxilə edərdilər. Ona görə də Türkiyə prezidentinə təşəkkür edirik”.