Əlimizdə başqa silah yoxdur

Türkiyədə artıq kütləvi peyvəndləmə xəritəsi tərtib edilib

İlk mərhələ üçün alınmış 10 milyon peyvənd  2 dozada olmaqla 5 milyon insana vurulacaq

"Biz də başlayacağıq. Bildiyim qədər Türkiyə ilə danışıqlar aparılır. Onların istifadə etdiyi vaksindən biz də istifadə edəcəyik"

Dekabrın 25-dən koronavirus əleyhinə peyvəndləmə başlayacaq. Türkiyə hökuməti peyvəndləmə ilə bağlı artıq son hazırlıq mərhələsindədir. Verilən məlumatlara görə, Türkiyə koronavirus əleyhinə peyvəndi Çindən alıb. İlk mərhələ üçün alınmış 10 milyon peyvənd  2 dozada olmaqla 5 milyon insana vurulacaq. Türkiyə Səhiyyə Nazirliyinin koronavirusla mübarizə üzrə Elmi Şurasının üzvü, professor Tevfik Özlü yerli mediaya açıqlamasında peyvəndləmə barədə ortaya çıxan suallara cavab verib. Professor Özlü bildirib ki, peyvənddən çəkinmək lazım deyil. Çünki peyvənd hazırda koronavirus əleyhinə əldə olan yeganə silahdır: 

- Bu peyvənd Çində 1 milyon insana vurulub, hələ ki, mənfi, ya da yan təsirləri qeydə alınmayıb. Peyvənd 15-20 gün aralığı ilə 2 dozada vurulmalıdır. Koronavirusa qarşı immunitet isə peyvənddən 1,5-2 ay sonra formalaşır. Yəni bu gün peyvənd oldum, sabahdan təhlükə sovuşdu deyə bir şey yoxdur. Hətta ilk peyvənddən sonra koronavirusa yoluxma riski qalır. Koronavirusa qarşı orqanizmdə anticisimlərin yaranması zaman tələb edir. Amma ən əsası budur ki, bu virusa  qarşı  bir silahımız olacaq artıq. Hazırkı dönəmdə peyvənddən başqa silahımız yoxdur. 

T.Özlü qeyd edib ki, koronavirus peyvəndi Türkiyədə ilkin olaraq 700 səhiyyə işçisinə vurulub:

“Əgər peyvəndin istifadəsinə icazə verilibsə və istifadə olunubsa, deməli, onunla bağlı açıq qalan suallar yoxdur”. Professor bildirib ki, kütləvi peyvəndləmə üçün səhiyyə xəritəsi tərtib edilib. İlk olaraq 18-59 yaş arası əhali qrupu peyvəndləməyə cəlb ediləcək, daha sonra 65 yaş üzərində olanlar. Körpələr, uşaqlarsa hələ ki, siyahıda deyil.

Professor koronavirusun bütün orqanları sıradan çıxardığına da diqqət çəkib: “Bu, orqana az və ya çox təsir edir, deyə bir qayda yoxdur. Əksinə, koronavirusun təsir altına almadığı orqan yoxdur. Təpədən-dırnağadək bütün orqanlara təsir edib, sıradan çıxara bilər; ürək-damar sistemi, baş-beyin, mədə-bağırsaq, həzm sistemi, dəri, dırnaqlar... hər bir orqan”. 

Azərbaycanda peyvəndləmə nə zaman başlayacaq? Bununla bağlı konkret  vaxt hələ ki, söylənmir, lakin reallıq peyvəndin zəruri olduğu qənaəti yaradır. Pediatr Vaqif Qarayev “Şərq”ə açıqlamasında  peyvəndin vacib olduğunu dedi: 

- Peyvəndsiz bu pandemiyanın öhdəsindən gəlmək mümkün olmayacaq. İndi Çin, Türkiyə, ABŞ, Böyük Britaniya kütləvi vaksinasiyaya başlayır. Biz də başlayacağıq. Bildiyim qədər Türkiyə ilə danışıqlar aparılır. Onların istifadə etdiyi vaksindən biz də istifadə edəcəyik. Ona qədərsə, unutmayaq, silahımız maska, məsafə və təmizlikdir.

Sərtləşdirilmiş karantin qaydalarının yoluxma sayına təsiri 15-20 gündən tez özünü göstərməyəcək. Hamı qaydalara əməl etməlidir. Təmaslar, gediş-gəliş, qonaqlıqlar, məclislər, hamısından uzaq durmalıyıq.