“...Belə ucuz məişət film və serialları çəkməsinlər”
“Yəni sağlam rəqabət yaranmalıdır. Kanal auditoriyasını düşünməlidir”
“Reklamçı isə ictimai rəyin qorxusundan dost-tanışına yox, layiq olana reklam verməlidir”
“Pult əlimdə yerli kanallarda nə zaman axtarış aparsam, gözümə bir- iki serialımızın anonsları və ya kadrları dəyir. Hamısında nifrət, ağlagəlməz intriqa, kin, qəzəb. Qadan alım, bu ssenariləri kim yazır?”.
Bu sözləri tanınmış jurnalist İlhamə Rəsulova özünün “Facebbok” hesabında qeyd edib. O, vəziyyətin heç də ürəkaçan olmadığını bildirib:
“Yeni çəkilən seriallarımızda isə ailə içi qan davası... Komediya filmlərimizdə vəziyyət isə faciəvidir. 3-4 eyni sima bütün filmlərdə eyni səviyyəsizliklə rekord qırmaqla məşğuldur. Orta həddi tapa bilmirlərmi, görəsən?”.
Elə isə çıxış yolu nədir? Əgər belə davam etsə, deməli, axırda ya zövqümüz, ya gözümüz zərər görəcək.
Tanınmış media eksperti Zeynal Məmmədli jurnalistin qaldırdığı problemə dair “Sherg.az”a fikir bildirərkən, ümid yerinin olduğunu deyib. Amma bir şərtlə:
“Televiziyaların işinə qarışmaq müasir dövrün məntiqinə görə yaradıcılığa müdaxilədir. Tamaşaçı yalnız bir formada- konkret kanalı izləməməklə onu cəzalandıra bilər. Əgər sərbəst bazar varsa, bu, kanal üçün reklam itkisi deməkdir. Beləliklə, həmin kanalın analoji filmlər çəkməyə və ya istehsal şirkətlərinə ayırmağa vəsait olmayacaq.
Deməli, ən mühüm məqam məhz sərbəst bazardır. Təəssüf ki, bu məsələdəki durum o qədər də ürəkaçan deyil. Tamaşaçının rəyinin televiziyanın fəaliyyətinə bir çox hallarda heç bir təsirinin olmaması heç də təsadüfi deyil. Halbuki qardaş Türkiyədə izləyicilərin münasibətinə görə ən populyar seriallar belə, yarımçıq kəsilib. Biz dəfələrlə belə halların şahidi olmuşuq. Bir daha deyirəm, əgər kanal maliyyəni bazardan qazanırsa, onda ictimai rəy onun üçün maraqlı olmalıdır”.
Z.Məmmədli məsələyə təsir edən başqa məqamlardan da danışdı:
“Əlbəttə, burada tənqidçilərin fikirlərini də nəzərə almaq lazımdır. Ümumiyyətlə, belə rəylər, o cümlədən ictimai fikir daha çox dövlət kanalları, yəni AzTV ilə İTV üçün təsirlidir. Dövlət həmin televiziyalara elə şərait yaratmalıdır ki, özəl kanallar auditoriyanını itirməmək naminə belə ucuz məişət film və serialları çəkməsinlər. Yəni sağlam rəqabət yaranmalıdır. Kanal auditoriyasını düşünməlidir. Reklamçı isə ictimai rəyin qorxusundan dost-tanışına yox, layiq olana reklam verməlidir”.
