REAKSİYA ! - “İranın atom istehsal etməsi uzaqda deyil” – Təzyiqlər artacaq !

“Uranın 20 faizlik zənginləşdirilmiş istehsalı sübut etdi ki, İran beynəxalq agentliyin müfəttişlərini aldadıb”

“Belə bir şəraitdə beynəlxalq ictimaiyyət daha çox ABŞ-ı dəstəkləyəcək. Ona görə də İrana qarşı kəskin addımlar atıla bilər”

“Beləliklə, İrana qarşı daha ciddi və sərt sanksiyaların tətbiqi istisna edilmir”


İran 20 faizlik zənginləşdirilmiş uranın istehsalına başlayıb. Bu barədə İranın dövlət sözçüsü Əli Rəbii məlumat verib. O qeyd edib ki, yaxın saatlarda UF6 zənginləşdirilmiş uranın ilk partiyası hazır olacaq:
“Bu prosesin hamısı hamısı ilkin addımlar, o cümlədən Beynəlxalq Atom Enerjisi Agentliyinə (BAEA) məlumat vermək kimi addımlar atıldıqdan sonra baş tutub”. 
Dövlət sözçüsü bildirib ki, bu addım ölkə prezidenti Həsən Ruhaninin göstərişi ilə atılıb.



İranın bu addımını “Sherg.az”a şərh edən politoloq Sədrəddin Soltan söyləyib ki, 2015-ci ildə əldə edilən razılaşmaya əsasən, İrana uranı 3,67 faizədək zənginləşdirməyə icazə verilir. 2020-ci ildə isə Tehran hakimiyyəti bundan imtina edərək uranın zənginləşdirilməsini 4 faizədək qaldırdı:

“Məlumdur ki, ABŞ neft ixracına dair İrana qarşı sanskiya tətbiq edib. Bu sanksiyalar İran iqtisadiyyatını çökdürdü. Ona görə də İran uranın 20 faizədək zənginləşdirilməsi prosesinə başlayıb.

ABŞ və İsrail davamlı surətdə beynəlxalq ictimaiyyətin diqqətinə çatdırırdı ki, İranın atom silahı istehsal etməsi çox da uzaqda deyil. 20 faizədək zəngiləşdirilmiş uran isə daha çox hərbi sahədə tətbiq edilə bilər.

İran bununla beynəlxalq ictimaiyyətə qarşı təzyiq edir. Məsələn, bu gün Çinin Xarici işlər naziri bəyan edib ki, ABŞ təcili olaraq sanksiyaları ləğv etməlidir. Bu, beynəlxalq ictimaiyyət tərəfindən verilən ilk reaksiya idi. Hesab edirəm ki, növbəti addım Rusiyadan gələcək. Yəni ABŞ-ın sanksiyalarına qarşı təzyiqlər genişlənəcək”.

S.Soltan vurğulayıb ki, İran 20 faizlik zənginləşdirilmiş uranın istehsalına başlamaqla beynəlxalq ictimaiyyəti, İsrail və ABŞ tərəfdarlarına təzyiq göstərir:

“İran ərəb ölkələrini təhdid edir ki, ona qarşı sanksiyaların ləğv edilməsi kampaniyalarına qoşulsunlar. Böyük ehtimalla ABŞ-ın addımı sanksiyaların ləğvinə səbəb olmayacaq.

Əksinə ABŞ bəyan edəcək ki, illər uzunu irəli sürdükləri ehtimallar öz təsdiqini tapdı. İran doğrudan da beynəlxalq ictimaiyyətdə nüvə obyektlərindəki fəaliyyəti ilə bağlı şəffaf olmayıb.

Yəni uranın 20 faizlik zənginləşdirilmiş istehsalı sübut etdi ki, İran ötən illər ərzində beynəxalq agentliyin müfəttişlərini aldadıb. Belə bir şəraitdə beynəlxalq ictimaiyyət daha çox ABŞ-ı dəstəkləyəcək. Ona görə də İrana qarşı kəskin addımlar atıla bilər. ABŞ-ın blokunda olan qüvvələr İranı tənqid edəcəklər.

Beləliklə, İrana qarşı daha ciddi və sərt sanksiyaların tətbiqi istisna edilmir”.