"Diləyirik ki, toylara da icazə verilsin"

Elnarə Abdullayeva: "Qızıl məsələsini çoxdan demişəm ki, çətinliyə düşəndə qızıllarımı satıb yemişəm"

Sevilən xanəndə, Əməkdar artist Elnarə Abdullayeva “Günün sədası” proqramına qonaq olarkən bir ildir toyların olmamasından, şəxsinə yazılan tənqidlərdən danışıb. Xanəndə həmin verilişdə belə deyib: “Kimsə soruşur, bir ildir müğənnilər heç yana getmirlər, nə edirlər? Oturub gözləyirik ki, nə vaxt pandemiyadan öləcəyik. İndi bir məqsədimiz var, nə vaxt öləcəyik? Bunu niyə danırıq? Bizim işimiz musiqidir, onsuz yaşaya bilmərik. Biz toya gedəndə pulun hamısını özümüzə götürməmişik.

Musiqiçilərə də qonorar vermişik. Heç musiqiçinin arxasınca danışarlar? Kiminsə şad günü olur, gedib əyləndiririk. Evdə oturmaqdan gərginləşirik. Toy çətindir, bunu bütün sənət adamları bilir. Amma bu əziyyətə baxmayaraq, pandemiya başlayandan gərginik. İnsanlar elə başa düşür ki, nəsə çatışmazlıqdan, aclıqdan edirik. Bu, sənət aclığıdır. Bu durum bizi öldürür. Yığışardıq, oxuyardıq. Bütün sənət dostlarım üçün darıxıram. Bir tikə şor-çörəklə doyan adamam. Qızıllarımı satmışam, yemişəm”.

Biz də Elnarə xanımın özü ilə əlaqə saxlayıb, sözügedən açıqlaması ilə bağlı söhbət etdik. Əməkdar artist “Şərq”ə verilişdə toyların yoxluğundan şikayətlənmədəyini söylədi:

“Ümumiyyətlə, bir musiqiçi kimi işin olmamasından söz açdım. Adamın bağrı çatlayır axı. Hərənin öz işi var, biz də sənətlə məşğuluq. Qızıl məsələsini çoxdan demişəm ki, çətinliyə düşəndə qızıllarımı satıb yemişəm. Yəni köhnə söhbətdir.

İnsan hər çətinliyə dözür, təki salamatçılıq olsun, Tanrı dərd göstərməsin.

İkinci bir tərəfdən də işimiz, tamaşaçımız üçün darıxırıq. Məşq eləmək, oxumaq da istəyirik. Hamımızın dərdimiz-sərimiz budur. Allah deyib, oturmuşuq.

Şükür hər şey yaxşıdır. Diləyirik  ki, toylara da icazə verilsin, cavanlarımız ailə qursun. Gözəl günlərdə, şadlıqda iştirak edək. Elnən gələn toy-bayramdır.

Bir də ki, pandemiya tək bizim işimizə deyil, bir çox sahəyə təsir göstərib. Bu günə də şükür. Allah millətimizə xoşbəxt günlər qismət eləsin. Torpaqlarımızı işğaldan azad etdik, ona görə ürəyimiz də sakitdir”.