Vətən savaşı dövründə Sadıqov harada idi? – Deputat danışır    

Müdafiə Nazirliyinin sabiq Baş Qərargah rəisi Nəcməddin Sadıqovla bağlı xəbərlər yenə ölkə gündəminin əsas mövzusudur. Ordumuzda baş verənlərlə bağlı müxtəlif iddiaların ardı-arası kəsilmir. Məhz bu iddialardan sonra parlamentin orduya nəzarəti məsələsi müzakirə edilir. Hətta bununla bağlı bəzi təkliflər də səsləndirilir. Bu yaxınlarda millət vəkili Zahid Oruc parlamentin orduya nəzarət etməli olduğuna dair təklif verib.
Maraqlıdır, bu təklif reallaşa bilərmi?

Sualımızı cavablandıran millət vəkili Elman Məmmədov “Sherg.az”a bildirib ki, ordumuza ümumxalq nəzarəti var. Eyni zamanda parlamentdə ordu ilə bağlı müəyyən müzakirələr aparılır, qanunlar qəbul edilir:

“Ordu elə bir qurumdur ki, orada hərbi və dövlət sirri kimi məsələlər var. Hərbi sistemdə olan bütün məqamlar ictimaiyyətə açıqlanmır. Lazım olduqda deputatlar parlamentdə və mətbu orqanlarda ordumuz  barədə fikirlər irəli sürürlər”.

Deputatın sözlərinə görə, Nəcməddin Sadıqovla bağlı məsələ 20 ildən çoxdur ki, Azərbaycan mətbuatının gündəliyindən düşmür:

“Bu mövzuya dair tez-tez fikirlər söylənilir. 44 günlük müharibə dövründə də N.Sadıqovun “fəaliyyəti”, onun vəzifədən kənarlaşdırılması istiqamətində danışıqlar aparıldı. O, uzun illər Azərbaycan Müdafiə Nazirliyində çox yüksək vəzifə tutub. Onunla bağlı daha düzgün və doğru açıqlamanı Müdafiə Nazirliyi verə bilər.

Açıqlamaların hansı səviyyədə olmasına gəlincə, hərbi sistemin özünəməxsus qayda-qanunları və sirləri var. Düzünü desəm, N.Sadıqovla bağlı dəqiq məlumatım yoxdur. Amma İkinci Qarabağ müharibəsində onun fəaliyyətsizliyi və proseslərdən uzaqlaşdırılması hər bir azərbaycanlı kimi məni də narahat etdi.

Hər kəsdə sual yarandı ki, “Baş Qərargah rəisi Vətən müharibəsi dövründə harada idi və nə ilə məşğul olurdu?” Düşünürəm ki, bu sualın dəqiq cavabını yalnız Müdafiə Nazirliyi verə bilər”.