Türkiyənin ana müxalifət partiyası olan Cümhuriyyət Xalq Partiyasından istefaların yeni mərhələsi başlayıb. Son olaraq tanınmış siyasi fiqurlardan biri - Nejat Önder partiyadan gedib.
Partiyanın həyata keçirdiyi siyasətdən narazılıq ifadə edən Nejat Önder CHP-dən ayrılaraq, hakim Ədalət və İnkişaf Partiyasına (AKP)-yə üzv olub.
“Sherg.az” Türkiyə mətbuatına istinadən xəbər verir ki, CHP-dən istefa verərək hakim AKP-yə üzv olan Nejat Önderin partiya nişanını şəxsən prezident və partiya sədri Rəcəb Tayyib Ərdoğan taxıb.
Nejat Önder müxalifətdən hakim partiyaya keçməsinin səbəbini bu cür açıqlayıb:
“Məni AKP-yə gətirən səbəblərdən ən mühüm Atatürklə bağlıdır. Hörmətli Prezidentimizin də vurğuladığı kimi, CHP Atatürkdən sui-istifadə edir. Ancaq özlərinə lazım olanda Atatürkün adının arxasına gizlənir və özlərini sığortalayırlar. Əfsuslar olsun ki, bu gün partiya rəhbərliyində Cümhuriyyətin və CHP-nin qurucusunun adını zikr etməkdən diksinən adamlar var”.
Önder CHP-nin terrorçu güclərlə əməkdaşlığından çox narahat olduğunu dilə gətirib:
“Ən əsası isə odur ki, hazırda CHP-də terrorçu PKK və PYD ilə əlbir olmaq, onlarla birlikdə çalışmaq düşüncəsində olan şəxslər var. Ona görə bunlara etiraz olaraq CHP-dən getməyə və hazırda Türkiyə üçün daha yaxşı işlər görən AKP-yə üzv olmağa qərar verdim. Bundan sonra hakim partiyanın və ölkəmizin uğurları naminə var gücümlə çalışacağıma heç kimin şübhəsi olmasın”.