Aprelin 14-də Azərbaycan Respublikasının Prezidenti İlham Əliyevin və Belarus Respublikasının Prezidenti Aleksandr Lukaşenkonun iştirakı ilə Azərbaycan-Belarus sənədlərinin imzalanması mərasimi olub. AZƏRTAC xəbər verir ki, “Azərbaycan Respublikasının Qida Təhlükəsizliyi Agentliyi ilə Belarus Respublikasının Kənd Təsərrüfatı və Ərzaq Nazirliyi arasında baytarlıq sahəsində anlaşma və əməkdaşlıq haqqında Anlaşma Memorandumu”nu Azərbaycanın kənd təsərrüfatı naziri İnam Kərimov və Belarusun kənd təsərrüfatı və ərzaq naziri İvan İvanoviç Krupko imzalayıblar.
“Azərbaycan Respublikasının Dövlət Turizm Agentliyi ilə Belarus Respublikasının “Milli Turizm Agentliyi” Dövlət qurumu arasında turizm sahəsində əməkdaşlıq haqqında Anlaşma Memorandumu”nu Azərbaycanın xarici işlər naziri Ceyhun Bayramov və Belarusun xarici işlər naziri Vladimir Makey imzalayıblar.
“Azərbaycan Respublikasının Energetika Nazirliyi ilə Belarus Respublikasının Energetika Nazirliyi arasında energetika sahəsində əməkdaşlıq məsələlərinə dair Anlaşma Memorandumu”nu Azərbaycanın xarici işlər naziri Ceyhun Bayramov və Belarusun xarici işlər naziri Vladimir Makey imzalayıblar.
Politoloq İlqar Vəlizadə sözügedən sənəd barədə “Sherg.az”a danışıb:
“Bilirsiniz ki, regionda yeni geosiyasi reallıq yaranıb. Bu, MDB ölkələrinə də təsir edir. Həmin ölkələrin hər birinin öz maraqları var. Onlar daim bu maraqları müdafiə etməyə hazır olduqlarını göstərməlidirlər.
Eyni ilə Azərbaycan kimi. İkinci bir tərəfdən, məlum səfəri MDB məkanında müstəqil siyasət yeridən ölkələr arasında münasibətlərin yenidən qurulması kimi qiymətləndirirəm. Nəzərə almaq lazımdır ki, Belarus MDB məkanında Azərbaycan üçün ikinci ticarət partnyorudur.
Ona görə də çoxşaxəli əməkdaşlıqdan söhbət gedir. Belarus öz məhsullarını regiona ixrac etmək istəyir. Belarus məhsullarını Azərbaycanda görə biləcəyik”.
