“Vəzifə öhdəliklərini yerinə yetirə bilməyən şəxslərlə əmək müqaviləsinə xitam veriləcək”
Təhsil nazirinin müvafiq əmrinə əsasən, 13 saylı Ərazi Maliyyə Hesablaşma Mərkəzində araşdırma aparılıb. Təhsil Nazirliyindən verilən məlumata görə, araşdırma zamanı bir sıra ciddi nöqsanlar aşkar edilib, yol verdiyi nöqsanlara görə 13 saylı Ərazi Maliyyə Hesablaşma Mərkəzinin rəisi Məhərrəmov Raqub Ərşad oğlu işdən azad edilib. Salyan Rayon Təhsil Şöbəsinin müdiri Piriyev Xudaverdi Əliyusif oğluna əmək funksiyalarını keyfiyyətsiz yerinə yetirdiyinə, əmək müqaviləsi ilə müəyyənləşdirilmiş vəzifələrin icrasına səhlənkar yanaşdığına və rayonun ümumi təhsil müəssisələrinin işinə zəif nəzarət etdiyinə görə töhmət verilib.
Həmçinin, rəhbərlik və nəzarətdə ciddi nöqsanlara yol verdiyinə, vəzifə səlahiyyətlərindən sui-istifadə etdiyinə, əmək müqaviləsi üzrə öhdəlikləri və vəzifə funksiyalarını yerinə yetirmədiyinə görə Salyan rayonu Qarabağlı kənd 2 nömrəli tam orta məktəbin direktoru Bayramov Emin Knyaz oğlu, Yeni Uluxanlı kənd tam orta məktəbinin direktor səlahiyyətlərini icra edən Qəmbərov Lətif İsbəndiyar oğlu işdən azad edilib. Əmək funksiyalarını keyfiyyətsiz yerinə yetirdiklərinə, əmək müqavilələri ilə müəyyənləşdirilmiş vəzifələrin icrasına səhlənkar yanaşdıqlarına görə Salyan rayonu Çuxanlı kənd tam orta məktəbinin direktoru Heybətov Firdovsi Əlihüseyn oğluna, I Varlı kənd tam orta məktəbinin direktor əvəzi Nəzərov Bəylər Möhtəbər oğluna və Cəbrayıl rayonu Əmirvarlı kənd tam orta məktəbinin direktoru Məmmədova Lətafət Aşir qızına sonuncu xəbərdarlıqla şiddətli töhmət verilib.
Eyni zamanda əmək funksiyalarını keyfiyyətsiz yerinə yetirmiş, əmək müqavilələri ilə müəyyənləşdirilmiş vəzifələrin icrasına səhlənkar yanaşmış 13 saylı ƏMHM-nin məsul əməkdaşları barəsində intizam tənbehi tətbiq edilib.
Həmçinin Masallı Rayon Təhsil Şöbəsi tərəfindən aparılmış yoxlamaların nəticəsinə əsasən, Təhsil Nazirliyinin müvafiq əmri ilə işlərində yol verdiyi nöqsanlara görə Masallı şəhər 1 nömrəli tam orta məktəbin direktoru Hüseynova Mirxanım Mirhəbib qızı və Masallı şəhər 6 nömrəli tam orta məktəbin direktoru Nəzərov Elman Eldar oğlu tutduqları vəzifədən azad edilib. Aidiyyəti struktur bölmələr araşdırmaları davam etdirilir və müvafiq tədbirlər görülür.
Təhsil eksperti Kamran Əsədov sözügedən sahədəki kard islahatları barədə “Sherg.az”a danışdı. O, aparılan islahatları yüksək qiymətləndirir:
“İndi əvvəlki illərlə müqayisədə əmək funksiyasını yerinə yetirə bilməyənlərin vəzifədən uzaqlaşdırılması daha intensiv xarakter alıb. Bu, təhsilin keyfiyyətinin artırılması və yalnız bu sahəyə yararlı olan şəxslərlə əmək münasibətlərinin davam etdirilməsi ilə bağlıdır. Əlbəttə, müsbət tendensiyadır. Çünki respublikada 4447 orta təhsil müəssisəsi var. Onların bəziləri funksiyalarını uğurla yerinə yetirə bilmir, hətta vəzifə səlahiyyətlərindən sui-istifadə edirlər. Çox qısa müddətdə bir çox məktəb direktorlarının vəzifələrindən kənarlaşdırılması nazirliyin bu istiqamətdəki qəti mövqeyindən xəbər verir. Deməli, bundan sonra da vəzifə öhdəliklərini yerinə yetirə bilməyən şəxslərlə əmək müqaviləsinə xitam veriləcək. Bu tendensiyanı yüksək qiymətləndirirəm. Çünki təhsil strateji sahədir. Təhsil alanlar ölkənin gələcəyini müəyyənləşdirirlər. Fikrimcə, islahatlar davam edəcək”.
