Qabil Hüseynli: "Bu dinamika davam edəcək, çünki ölkənin iqtisadi durumu gün keçdikcə ağırlaşır"
"Vaxt gələcək ki, Ermənistanda qocalardan başqa kimsə qalmayacaq"
Erməni politoloqlar təşvişdədirlər. Çünki son 6 ayda 138 min adam Ermənistanı tərk edib. Onların 80 mini bir daha geri qayıtmayacaq. Bu barədə erməni politoloq Qrant Mikaelyan bildirib.
“Bu, yalnız aviadaşıyıcıların məlumatlarıdır. Eyni zamanda miqrasiyada ciddi artım olduğunu göstərən kifayət qədər böyük rəqəmdir. Çox güman ki, onlardan 80 mini əsla vətənlərinə dönməyəcək”.
Politoloqa görə, ölkəni tərk edən vətəndaşların əsas hissəsi Rusiyaya gedib. Çünki koronavirus pandemiyası kontekstində ora getmək ən asandır, xüsusən də Rusiya ermənilər üçün daha açıq ölkədir.
138 min Ermənistan və qısa zaman üçün çox böyük rəqəm hesab olunur. Ölkədəki demoqrafik böhran getikcə dərinləşir. Qarabağ müharibəsindəki məğlubiyyət Rusiyada və bütün dünyada ermənilərin və Ermənistanın nüfuzuna ciddi ziyan vurub.
Sabiq dövlət müşaviri, politoloq Qabil Hüseynlinin “Sherg.az”a açıqlamasına görə, ermənilər vətən hissi zəif olan bir toplumdan ibarətdirlər:
“Onlar yüz illər ərzində o diyardan bu diyara köç etməyə öyrəşiblər. İndi isə vəziyyət kifayət qədər ağırdır, ölkədə demoqrafik böhran yaşanır. Ermənistanda ölənlərin sayı çoxalıb, doğum sayı isə azalıb. Üstəlik, mühacirət edənlərin sayı əvvəlki illərə nisbətən həddindən artıq çoxdur. Bu, Qarabağ bölgəsində də aiddir.
Onların çoxusu Rusiyaya gedir, xarici ölkələrdə əlaqəsi olanlar isə xaricə üz tuturlar. Bu dinamika davam edəcək, çünki ölkənin iqtisadi durumu gün keçdikcə ağırlaşır.
Vaxt gələcək ki, Ermənistanda qocalardan başqa kimsə qalmayacaq. Ermənistan siyasi rəhbərliyi demoqrafik böhranı aradan qaldırmaq üçün tədbirlər görməyə çalışır.
Ancaq bunun üçün böyük vəsait və insanları inandırmaq lazımdır. Bu da baş tutmur. İnsanlar mövcud durumun və perspektivin ümidsiz olduğunu görərək, ölkəni birdəfəlik tərk edirlər”.
