Qadınların hər il pensiya yaşı 6 ay artırılır

Gələn ildən Azərbaycanda qadınların pensiya yaşı artırılacaq. Dövlət Sosial Müdafiə Fondunun sədr müavini Elman Mehdiyev Milli Məclisdə çıxışı zamanı qadınlar üçün pensiya yaşının 2014-cü ildən 59 yaş yarım olacağını bildirib. O, pensiya üçün tələb olunan sosial sığorta stajının isə dəyişməyəcəyini qeyd edib. Sözsüz ki, pensiya yaşının artırılması məsələsi də cəmiyyətdə xoş qarşılanmır. Sadə bir səbəbdən ki, onsuz da Azərbaycanda insanların orta ömür yaşı kişilər üçün 60-65, qadınlar üçün 65-70-i ötmür. Hələ bəlkə daha da tez. Yəni ömrümüz getdikcə qısalır. 59-60 yaşında nəhayət ki, təqaüdə çıxan qadın uzaqbaşı 3-4 il illərlə çəkdiyi zəhmətin bəhrəsini görə biləcək. Kişilər üçünsə bunu söyləmək xeyli çətindir. Ümumiyyətlə, son illər dünyada insan ömrünün qısalması tendensiyası hökm sürür. Belə olan halda hökumət büdcə kəsirini təqaüd yaşlı insanların sayının azalması hesabınamı bağlamaq istəyir?! Milli Məclisin İqtisadi siyasət komitəsinin üzvü, millət vəkili Əli Məsimli isə qadınların pensiya yaşının artırılması ilə bağlı DSMF rəsmisinin açıqlamasının yeni qərar olmadığını açıqlayıb: "Bir neçə il əvvəl qəbul olunan qərara əsasən qadınlar üçün pensiya yaşı 60, kişilər üçün isə 63 yaş olacaq. Sadəcə vətəndaşlar hökumətdən incik düşməsin, sosial narazılıqlar baş verməsin deyə, bu qərar mərhələ-mərhələ icra olunur. Yəni hər il yaş həddi 6 ay nisbətində dəyişir. Bu mənada həmin qərardan üzü bu yana hər il qadınların pensiya yaşı 6 ay artır”. Hazırda qadınlar üçün yaş həddinin 59 olduğunu vurğulayan millət vəkili gələn il üçün də bu yaşın 59 yarım olmasının təbii olduğunu vurğulayıb: "Əvvəllər qadınların pensiya yaşı 57 idi. Kişilərdə isə 60 idi. Qərarın icrasından sonra isə müntəzəm olaraq hər il müvafiq artım gedir. Bu rəqəm qadınlarda 60 yaşa, kişilərdə isə 63 yaşa çatdıqdan sonra isə bu tendensiya yekunlaşacaq. Elman Mehdiyevin qadınların pensiya yaşının artması barədə səsləndirdiyi fikirlər də onun mülahizəsi deyil. O, əvvəlcədən qanunvericilikdə yer alan faktı səsləndirib”.