Çay Rusiyadakı ev təsərrüfatlarında ən geniş yayılmış isti içki olaraq qalır. Respondentlərin 86%-i çayı hər gün içdiyini bildirib, halbuki sorğuda iştirak edənlərin 76%-i qəhvəni müntəzəm istehlak edir. İsti içkilərdən müntəzəm istifadə etməyənlərin payı isə 1%-dən azdır.
Sherg.az xəbər verir ki, bu nəticəyə TIAR Center tərəfindən aparılan ümumrusiya sosioloji araşdırmanın yekunlarına əsasən gəlinib. “Gazeta”nın tanış olduğu nəticələrə görə, analitiklər müəyyən ediblər ki, çay süfrəsi (şirniyyatlarla birlikdə çay içilməsi) rusiyalıların gündəlik həyatında xüsusi yer tutur. Bu, qonaqpərvərliyin, ailə ünsiyyətinin və mədəni ənənələrin atributu hesab olunur, rahatlıq və istiliklə assosiasiya edilir.
Adətən çay evdə içilir - bunu sorğuda iştirak edənlərin 91%-i təsdiqləyib. İşdə və ya təhsil müəssisəsində çay içənlərin payı 34%, kafelərdə isə 12% təşkil edir. Sorğu iştirakçılarının sözlərinə görə, çay daha çox ailəvi söhbətləri və qonaq qəbulunu müşayiət edir.
Çaya verilən şirniyyatlar rusiyalılar üçün ilk növbədə qonaqpərvərlik (48%), ailə görüşləri (26%) və yaxınlara qayğı (25%) ilə əlaqələndirilir. Respondentlərin 18%-i üçün isə çay və şirniyyatlar iş fasilələri ilə bağlıdır.
Çayla birlikdə ən populyar 5 şirniyyat bunlardır: peçenye – 63%, konfet – 52%, evdə hazırlanmış şirniyyatlar – 39%, şokolad – 30%, pryanik – 28%. Yalnız 9% rusiyalı çayı və ya qəhvəni şirniyyatsız içməyə üstünlük verir.
Maraqlıdır ki, əhalinin 62%-i çay içməyi samovarla əlaqələndirir. Rus çay süfrəsinin əsas simvolları arasında mürəbbə (46%), bublik (42%), nəlbəki ilə fincan (41%) və pryanik (33%) də qeyd olunur.
Respondentlərin 85%-i hesab edir ki, şirniyyatlarla çay içmək ailə ünsiyyətinin bir formasıdır, 84%-i isə bunun mədəni ənənənin bir hissəsi olduğunu düşünür. Rusiyalıların 45%-i üçün evdə çay içmək rahatlıq və istilik hissi ilə assosiasiya olunur.
TIAR Mərkəzində qeyd edirlər ki, “evdə şirniyyatlarla çay içilməsi ölkənin tanınan sosial kontekstlərindən biri kimi qiymətləndirilir”. Onların fikrincə, bu ənənənin təşviqi qonaqpərvərlik və ailə dəyərləri ilə bağlı həm mədəni, həm də turizm layihələrinin bir hissəsinə çevrilə bilər.
Daha əvvəl bir çay paketinin neçə dəfə dəmlənməsinin təhlükəsiz olduğu da açıqlanmışdı.
