Ona görə sərnişinlər avtobuslardan istifadəyə üstünlük verir
Həm də ictimai nəqliyyatda aparılan islahatlar da effekt verməyə başlayıb
Cari ilin yanvar-may aylarında Azərbaycanda avtobuslarla daşınan sərnişinlərin sayı taksiyə minənlərin statistikasını ötüb.
Dövlət Statistika Komitəsinin hesabatına əsasən, avtomobil nəqliyyatı ilə daşınan sərnişinlərin sayı illik müqayisədə 21.3 faiz artaraq 540 mln. 376.4 minə çatıb.
Avtobusla sərnişin daşınması 25.2 faiz artıb, taksi ilə isə əksinə, 21.4 faiz azalıb.
Görəsən, əhalinin taksilərdən daha az istifadə etməsi nə ilə bağlıdır?
Nəqliyyat eksperti Eldəniz Cəfərovun “Şərq”ə açıqlamasına görə, ilin birinci rübündə avtobusdan istifadə edən sərnişinlərin sayının artması yeni strukturların yaranması və bu sahədə aparılan islahatlarla bağlıdır:
”İslahatlar öz effektini göstərir. Cari ilin yanvar ayından şəhərlərarası daşınmada istifadə olunan avtobusların sayı artırılıb, eyni zamanda sərnişinlərə göstərilən xidmət keyfiyyətinin yüksəlməsi ilə əlaqədar müəyyən işlər görülüb.
Hətta mart ayında əhali Novruz bayramı ilə bağlı olaraq paytaxt və digər iri şəhərlərdən bölgələrə avtobusla səyahət etməyə üstünlük verib. Həmin ərəfədə Bakıdan bölgələrə və ya əksinə 50 mindən çox vətəndaşın daşınması məhz avtobuslar vasitəsilə həyata keçirilib. Eyni zamanda Gəncə və Sumqayıtı istisna etməklə digər bölgələrə səfərlərin ancaq avtobusla həyata keçirilməsi, dəmiryol qatarlarının işləməməsi avtobusla sərnişin daşınmasının artımına səbəb olub. İşğaldan azad olunan rayonlarımıza edilən səfərlər də müvafiq avtobuslarla həyata keçirilir. Bunun da müəyyən təsiri var”.
Ekspertin sözlərinə görə, taksi ilə sərnişindaşımanın azalması isə insanların daha çox fərdi avtomobillərə üstünlük vermələri ilə əlaqəlidir. Mövcud statistikaya görə, ölkəmizə idxal olunan şəxsi avtomobillərin sayı günbəgün artır. Əksəriyyəti yararsız olsa belə: “Həm də taksi xidmətindəki bəzi çatışmazlıqlar sərnişinlərin taksidən istifadəsinə mənfi təsir edir. Vətəndaş taksi xidmətindən narazı olduğuna görə fərdi avtomobildən istifadəyə üstünlük verir”.
