Oktyabrın 4-də Tbilisidə Qərb və Rusiya tərəfdarları yenidən toqquşacaq
Məhəmməd Əsədullazadə: "Hakim "Gürcü Arzusu" Partiyası müxalifətin yerlərdə qələbə əldə etməsinə imkan verməyəcək"
Oktyabrın 4-ü Gürcüstanın 64 şəhərində yerli idarəetmə orqanlarına seçkilər, mer və məclislər seçiləcək. Məclis seçkilərində qarışıq sistem (proporsional və majoritar sistemlər) tətbiq olunur. Mer seçilmək üçün etibarlı səslərin yarıdan çoxunu almaq, yerli məclislərə düşmək üçün partiyaların 4 faizlik baryeri keçməsi gərəkdir. Seçkilərə 12 partiya buraxılıb. "GORBİ" Beynəlxalq Tədqiqat Mərkəzinin 2,3 min nəfər arasında keçirdiyi sorğuya qatılan respondentlərin 65,9 faizi 4 oktyabr seçkilərində hakim Gürcü Arzusu Partiyasının namizədlərinə səs verəcəyini qeyd edib. Sorğu iştirakçılarının 10,7 faizi Qaxariya - Gürcüstan Uğrunda Partiyasına, 10,4 faizi Lelo Partiyasına dəstək nümayiş etdirib, qalan partiyalar ümumilikdə 3,7 faizlə kifayətlənib. Qeyd edək ki, Gürcüstanda hökuməti 150 yerlik parlamentdə azı 76 mandatı olan partiya qurur. 2012, 2016, 2020 və 2024-cü illərin parlament seçkilərində "Gürcü Arzusu" qalib gəlib. Yerli hakimiyyət qurumlarının böyük əksəriyyətinə də hakim partiya nəzarət edir. Seçkilərin gərgin keçəcəyi indidən bəllidir. Gürcüstanın Baş naziri İrakli Kobaxidze deyib ki, Ukraynada Maydan hadisələri xarici kəşfiyyat orqanları tərəfindən maliyyələşdirilirdi. Gürcüstanda da buna bənzər olaylar baş verir, amma hökumət belə bir ssenariyə imkan verməyəcək: "Yadınızdadır, məxfi xidmətlər Maydanı necə maliyyələşdirdi. Bu, Ukrayna üçün nə ilə nəticələndi? Ukrayna dövləti məhv edildi. Xarici kəşfiyyat xidmətləri tərəfindən maliyyələşdirilən inqilabdan sonra Ukrayna iki müharibə yaşadı. Təbii ki, ölkəmizdə belə bir ssenarinin inkişafına imkan verməyəcəyik".
Politoloq, Milli Cəbhə Partiyasının sədr müavini Məhəmməd Əsədullazadə Sherg.az-a deyib ki, Gürcüstanda baş verənlər Azərbaycan üçün də əhəmiyyət kəsb edir. Ekspert vurğulayıb ki, qonşu ölkədə inqilab və siyasi xaosun baş verməsi Gürcüstanın milli birliyinə, bölgədəki sabitliyə zərbə vurur:
"Gürcüstanda yaşayan azərbaycanlıların hüquqları və təhlükəsizliyi Azərbaycan üçün əsas prioritet olaraq qalır. Hakim "Gürcü Arzusu" Partiyasının keçirdiyi parlament seçkilərinin legitimliyi Qərb tərəfindən tanınmır. ABŞ başda olmaqla, Avropa İttifaqı "Gürcü Arzusu"nu Rusiya yönümlü siyasət aparmaqda ittiham edir. Həqiqətən, "Gürcü Arzusu" hökumətinin qəbul etdiyi qərarlar Qərblə əlaqələri kifayət qədər böhranlı vəziyyətə gətirib. Oktyabrın 4-də hakimiyyət üçün sınaq olacaq. Baş nazirin açıqlamasına fikir verdikdə görürük ki, müxalifətin parçalanması hökumətin maraqlarına xidmət edir. Ölkədə keçiriləcək yerli özünüidarəetmə seçkiləri ərəfəsində qüvvələr iki əsas düşərgəyə bölünüblər. "Lelo", "Vətəndaşlar", "Girçi" və "Gürcüstan Uğrunda" partiyaları seçkilərdə iştirak edəcək. Amma "Vətəndaş Hərəkatı" partiyası seçkiləri boykot edir. Sabiq prezident M.Saakaşvilinin lideri olduğu düşərgə küçə etirazlarını davam etdirir".
Siyasi şərhçinin fikrincə, hakim "Gürcü Arzusu" Partiyası müxalifətin yerlərdə qələbə əldə etməsinə imkan verməyəcək:
"Qərbin bu seçkilərdən sonra Gürcüstana qarşı ciddi təzyiqlər və sanksiyalar tətbiq etməsi mümkündür. Rəsmi Tbilisinin siyasəti Qərbin səbr kasasını daşırır. Bir növ oktyabrın 4-də Tbilisidə Qərb və Rusiya tərəfdarları yenidən toqquşacaq. Gürcüstanda bələdiyyə seçkilərində hakim partiya qələbəsini elan edəcək. Amma ölkədə inqilab prosesinin baş verməsi gözlənilmir. Müxalifətdə vahid liderin olmaması və daxildə qütbləşmə hakimiyyətin onlara qarşı təzyiqlərini artırır. Müxalifət isə köməyi Qərbdə axtarır. Qərb bölünmüş, parçalanmış hərəkatlara dəstək vermək fikrində deyil".
