Bir məsələ qalır
Ermənistan konstitusiyasında Azərbaycana qarşı ərazi iddiaları ilə bağlı məsələ sülh müqaviləsinin vacib şərtlərindən biridir
Azərbaycan Ermənistanın sülh sazişi layihəsi ilə bağlı təkliflərinə cavab verib. Bu barədə Ermənistan Xarici İşlər Nazirliyinin (XİN) mətbuat katibi Ani Badalyan bildirib. O qeyd edib ki, Azərbaycan sülh sazişi üzrə cavab təkliflərini (11-ci təkliflər paketi) Ermənistana göndərib. Xatırladaq ki, ötən gün Ermənistan xarici işlər nazirinin müavini Paruyr Ovannisyan bildirmişdi ki, İrəvan Bakıya sülh müqaviləsinin mətninin tam olaraq razılaşdırılmasını özündə ehtiva edən təkliflər paketi göndərib və qarşı tərəfdən cavab gözləyir.
Vətəndaş Həmrəyliyi Partiyasının sədr müavini Samir Əsədli "Sherg.az"a deyib ki, Ermənistan konstitusiyasında Azərbaycana qarşı ərazi iddiaları ilə bağlı məsələ sülh müqaviləsinin vacib şərtlərindən biridir. Siyasi şərhçi bildirib ki, sülh müqaviləsinin indiyədək razılaşdırılmamış bütün bəndləri üzrə razılığa gəlmək imkanını hər iki tərəf rəsmən etiraf edib:
"Ermənistan konstitusiya məhkəməsinin ölkənin İstiqlaliyyət bəyannaməsinin konstitusiyada yer almayan müddəalarının etibarsız sayılmasına dair qərarını bu istiqamətdə ilk addım saymaq olar, amma bu, yetərli deyil. Çünki qərarda 1990-cı ildə qəbul olunmuş İstiqlaliyyət bəyannaməsindən tamamilə imtina yoxdur. Halbuki həmin sənəddə yer almış ərazi iddiasının da aradan qaldırılması mütləqdir. İkincisi, məhkəmə qərarı konstitusiyanın istinad mənbəyini, yəni İstiqlaliyyət Bəyannaməsini gücdən salmaq səlahiyyətində deyil. Yəni Azərbaycanın tələbinin yerinə yetirilməsindən də söhbət getməməlidir".
Ekspert diqqətə çatdırıb ki, indiki durumda Bakının digər maraq və mənafelərinin təmin olunmadığı xüsusi məqam da var:
"Söhbət 10 noyabr 2020-ci il tarixli üçtərəfli Bəyanata əsasən, Naxçıvana maneəsiz – heç bir gömrük və sərhəd nəzarəti olmayan yolun təmin edilməsindən gedir. Əlbəttə, Azərbaycan Ermənistanın razılığının olmayacağı, daha konkret desək, ölkənin üçtərəfli bəyanatla üzərinə düşən öhdəliyi yerinə yetirməyəcəyi təqdirdə, sözügedən yolun İran ərazisindən keçməsi üzərində dayanır. Azərbaycan ümumən təminat axtarışındadır və sülh üçün səmimiyyətin başlıca faktor olduğu qənaətindədir. Ermənistan otuz ilə yaxın müddətdə işğalçılıq siyasəti gerçəkləşdirən ölkə olaraq, bir daha buna yol verməyəcəyinə dair həm siyasi, həm də mənəvi öhdəlik götürməlidir".
