Azərbaycanla Ermənistan arasında münaqişənin bitməsi Gürcüstanın da işğal altındakı ərazilərinin azad edilməsi üçün danışıqlara başlamağın vaxtının çatdığını göstərir.
Bunu APA-nın Gürcüstan bürosuna açıqlamasında Gürcüstanın Abxaziya Muxtar Respublikasının mühacirətdə olan Ali Məclisinin sədri Camal Qamaxariya deyib.
O, Gürcüstanın hakim “Gürcü Arzusu” partiyasının sülh siyasəti yürütdüyünü və bunun doğru qərar olduğunu vurğulayıb.
“İşğala necə son veriləcəyi ilə bağlı dəqiq ssenari haqqında danışmaq çox çətindir. Lakin daha əvvəl hökumətimizin də açıqladığı kimi, biz buna yalnız sülh yolu ilə nail olmalıyıq, bu münaqişə sadəcə sülh yolu ilə həll olunmalıdır. Təbii ki, sülh yolu ilə həll bərabərində qarşı tərəflə müzakirələri və görüşləri nəzərdə tutur. Deyə bilmərəm ki, hazırda danışıqlar üçün hər şey hazırdır, lakin Abxaziyada baş verən hadisələr, ümumilikdə Gürcüstanda cərəyan edən hadisələr, eləcə də regionda baş verən hadisələr, məsələn, Ermənistan-Azərbaycan münaqişəsinin faktiki olaraq bitməsi, həmçinin beynəlxalq arenada baş verən hadisələr bizə onu göstərir ki, yaxın gələcəkdə bu cür danışıqlar başlamalıdır. Bu danışıqlar həm abxaz tərəfi ilə, eyni zamanda, həmin əraziləri işğal edən dövlət ilə başlamalıdır”, - Qamaxariya deyib.
O əlavə edib ki, “Gürcü Arzusu” partiyası ölkənin ərazi bütövlüyünə nail olmaqla yanaşı, regionda sülhün qorunub saxlanılmasının tərəfdarıdır və bu məqsədlə uzun zamandır barışıq siyasəti həyata keçirir. Qamaxariya hakimiyyətin seçkilərdən sonra barışıq əldə edilməsi və ərazi bütövlüyünün bərpası istiqamətində bir çox işlər planlaşdırdığını qeyd edib: “Bildiyiniz kimi, “Gürcü Arzusu” uzun zamandır barışıq siyasətini həyata keçirir. Münaqişəyə, gərgin hadisələrə baxmayaraq, bütün bu illər ərzində gürcü və abxaz cəmiyyəti arasında əlaqələr və münasibətlər heç vaxt dayanmayıb. Doğrudur, oradakı de-fakto hakimiyyət və işğalçılar ilə danışıqlar aparılmır, ictimaiyyət nümayəndələri ilə görüşülməli və bu istiqamətdə bir çox layihələr həyata keçirilməlidir. Bizim orada yaşayan vətəndaşlarımız, Gürcüstan dövlətinin tibbi yardımından pulsuz yararlana bilirlər və bu cür insanların sayı minlərlədir. Bundan əlavə bizim xarici tərəfdaşlarımızın dəstəyi ilə bir çox iqtisadi layihələrimiz də həyata keçirilir. Buna görə də biz bu mərhələdə münaqişənin həlli üçün şərtlər formalaşana qədər hər şey edirik və seçkilərdən sonrada bir çox şey edilməyə davam edəcək”, - Qamaxariya vurğulayıb.
