Ərəb Liqası Suriyaya görə İrana xəbərdarlıq edib və Tehranı Suriyada qarşıdurmaları qızışdırmaq və gərginliyi artırmaq cəhdlərindən əl çəkməyə çağırıb. Bu barədə Ərəb Liqası Katibliyinin bəyanatında deyilib. Bəyanatda bildirilib ki, Ərəb Liqası Suriyanın bir sıra şəhər və bölgələrində münaqişə qığılcımlarını alovlandırmaq məqsədi ilə atılan addımları narahatlıqla izləyir. Qeyd edək ki, dekabrın 11-də İranın dini lideri Əli Xamenei Suriya gənclərini üsyana səsləyən çıxış edib. Bundan sonra Suriyanın xarici işlər naziri Əsəd Əl-Şeybani İran hökumətindən Suriya xalqının suverenliyinə və iradəsinə hörmət etməyi istəyib və Tehranı bu ölkədə xaos yaratmaqdan çəkinməyə çağırıb.
Hərbi-siyasi ekspert Həşim Səhrablı “Sherg.az”a bildirib ki, Ərəb Liqasını İrana göndərdiyi bu mesajlar özlərinin dilindən açıq və birmənalı şəkildə ifadə olunub:
“Ərəb Dövlətləri Liqası ayrı-ayrılıqda və yaxud birlik formasında da görürlər ki, Suriyada Əsəd rejiminin devrilməsindən sonra hakimiyyəti ələ alan qüvvələr yenidənqurma işlərinə başlamaq istəyirlər. Eyni zamanda ölkədə normal sistem, mühit və rejim yaratmağa səylər göstərirlər. Amma İran tərəfi radikal tərəfdarları olan terrorist qrupların əliylə ölkədə xaos yaratmağa və öz təsirini Suriya üzərində saxlamağa çalışırlar. Təbii ki, bu qəbuledilməzdir, çünki Suriyanın öz maraqları var və müqəddəratını özü təyin etməlidir. Niyə İrandan asılı vassal ölkə olaraq fəaliyyət göstərməlidir? Ərəb Dövlətləri Liqası da başa düşürlər ki, İranın ölkəyə müdaxiləsi vəziyyətin sabitləşməyə yönələn addımlarının zərər görməsinə gətirib çıxara bilər. Həmçinin nəzərə almalıyıq ki, Ərəb dövlətlərindən bir çoxunun İranla dini, strateji baxımdan təzadlı mövqeləri var. Ona görə də Ərəb ölkələri İranın Suriyada nəzarəti ələ almasına və dayaqlarını möhkəmləndirməsinə fürsət vermək niyyətində deyillər”.
