Moldova hakimiyyəti prezident seçkilərini və Aİ-yə üzvlüklə bağlı referendumu saxtalaşdırmaq üçün müxalifət müşahidəçilərini seçki məntəqələrinə buraxmır.
APA xəbər verir ki, bunu müxalif Kommunistlər Partiyasından olan deputat Diana Karaman deyib.
“Hakimiyyət bizim seçimimizi oğurlamağa çalışır. Bizim müşahidəçilər Rumıniyada beş seçki məntəqəsində qeydə alınmayıb. Suçaava, Qalati, Konstansa, Bakau və İasi şəhərlərində seçki büroları bizim nümayəndələrimizi referendumda qeydə almaqdan imtina ediblər. Bu, açıq şəkildə göstərir ki, hakimiyyət müxalifət nümayəndələrinin seçki məntəqələrində olmasından qorxur və bu məntəqələrdə səsverməni istədikləri kimi keçirə bilmələri üçün əlindən gələni edir” – bu barədə Karaman Telegram kanalında videomüraciətində bildirib. Onun sözlərinə görə, Moldova mətbuatında artıq adıçəkilən şəhərlərdə seçicilərin avtobuslarla seçki məntəqələrinə kütləvi şəkildə daşınması ilə bağlı məlumatlar yayılıb.
