Hərbi blokların yaradılması ilə bağlı istənilən fikir qarşıdurma riski daşıyır və bu, qaynar fazaya keçə bilər. Bunu Rusiyanın xarici işlər naziri Sergey Lavrov Yaponiyanın NATO-nun Asiya analoqunun yaradılması təklifini şərh edərkən deyib. O bildirib ki, istənilən militarizasiya, hərbi blokların yaradılması ilə bağlı hər hansı ideyalar həmişə özləri ilə qaynar fazaya çevrilə biləcək qarşıdurma riskləri daşıyır. Qeyd edək ki, seçki kampaniyası zamanı Yaponiyanın yeni Baş naziri İşiba ölkənin müdafiə qabiliyyətinin gücləndirilməsini, Asiya NATO-sunun və regionda kollektiv təhlükəsizlik sisteminin yaradılmasının tərəfdarı olduğunu deyib.
Politoloq Zeynal Əmrəliyev “Sherg.az”a söyləyib ki, hazırda Rusiya və Çinin Yaponiya ətrafında hərbi gərginliyi durmadan artır:
“İki dövlətin də Yaponiya ilə bağlı mübahisəli məsələləri var. Məsələn, Yaponiya və Rusiya arasında Saxalin adaları məsələsi mövcuddur. Eyni zamanda Yaponiya Çinin Tayvan ərazisində hərbi şəkildə fəallaşmasından da narahatdır. Xüsusilə nəzərə almaq lazımdır ki, Çin və Rusiya Yaponiya sərhədində bir müddətdir əməliyyat keçirirlər. Buna görə də Yaponiya sözügedən vəziyyətdən narahatdır və Asiya NATO-nun yaradılması təklif edir. Bura əsasən Hindistanı daxil etmək istəyir. Bildiyimiz kimi Hindistan da NATO-nun üzvü deyil. Hindistan xarici işlər naziri bildirib ki, Yaponiyadan başqa strateji müttəfiqimiz yoxdur. Yaponiyanın təşəbbüsü ilə Asiya NATO-nun yaradılması Amerika Birləşmiş Ştatlarının mövqeylərinə də ciddi zərbədir. Çünki həmin qurumun yaradılması hazırki NATO-nun parçalanmasına gətirib çıxara bilər. Onsuz da Avropa dövlətləri NATO-dan ayrılmaq istəyirlər və ABŞ-nin hegomonluğunu qəbul etmirlər. Hazırki durumda Yaponiyanın istəyi ilə Asiya NATO-nun yaradılması qeyri-mümkündür”.
