ABŞ-İran gərginliyi artır. Tramp İranı Yəməndəki husilərə dəstəyini “dərhal” dayandırmağa çağırıb.
Sherg.az xəbər verir ki, “Truth” sosial hesabından açıqlama verən Tramp husilərlə bağlı İranı növbəti dəfə tənqid edib. İranın husilərə göndərdiyi hərbi texnikanın azaldığını qeyd edən Tramp, "Lakin İranın hələ də böyük miqdarda təchizat göndərdiyinə dair xəbərlər var. İran bu tədarükləri dərhal dayandırmalıdır" deyə qeyd edib.
Husilərin İranın dəstəyi olmadan təkbaşına döyüşməsi lazım olduğunu müdafiə edən Tramp, "Onlar hər halda müharibəni uduzacaqlar, lakin bu yolla daha tez itirəcəklər. Tamamilə məhv olacaqlar" deyə qiymətləndirmə edib.
Husilər martın 7-də İsrailə yardımın Qəzzaya girməsinə icazə verməsi üçün 4 gün vaxt verdiklərini, əks halda İsrailə qarşı dəniz əməliyyatlarına yenidən başlayacaqlarını açıqlayıb.
ABŞ prezidenti Donald Tramp martın 15-də “Truth” sosial platforması hesabında verdiyi açıqlamada orduya Yəməndə husilərə qarşı “kütləvi hücum” əmri verdiyini açıqlayıb.
Husilərin lideri Əbdül-Malik əl-Husi verdiyi açıqlamada, ABŞ təyyarələri və döyüş gəmilərinin husilərin hədəfi olacağını və onlar hücumlarını davam etdirdikcə, dəniz naviqasiyasındakı blokadaların Vaşinqtonu da əhatə edəcəyini bildirib.
Husilər ABŞ və İngiltərənin paytaxt Səna da daxil olmaqla bir sıra şəhərlərə endirdiyi hava hücumlarında 53 nəfərin öldüyünü, 98 nəfərin yaralandığını açıqlayıb.
