Əhliman Əmiraslanov bildirib ki, icbari tibbi sığorta ilə bağlı problemlər qalmaqdadır
"Əhalinin sağlamlığının qorunması haqqında” qanunun yenidən işlənməsinə ehtiyac var". Bunu Milli Məclisin Səhiyyə komitəsinin iclasında komitənin sədri Əhliman Əmiraslanov deyib. Komitə sədri bildirib ki, bu qanun 20 ildən çoxdur ki, qəbul edilib, yenidən işlənməsinə ehtiyac var: "Bu istiqamətdə Səhiyyə Nazirliyi ilə birgə fəaliyyətimiz davam edir. Çox güman ki, yeni qanun qəbul ediləcək".
"Dərmanların keyfiyyəti, əlçatanlığı və qiymətləri cəmiyyəti narahat edir"
Əhliman Əmiraslanov deyib ki, dərmanların keyfiyyəti, əlçatanlığı və qiymətləri cəmiyyəti narahat edir. Komitə sədri bildirib ki, icbari tibbi sığortadan insanların məmnunluğu get-gedə artır, amma yenə də problemlər qalmaqdadır: “Ona görə də “Tibbi sığorta haqqında” qanuna dəfələrlə dəyişikliklər edilir. Dərman vasitələrinin keyfiyyəti, əlçatanlığın cəmiyyəti narahat edən məsələdir. Seçicilər görüşlərdə dərmanların qiymətlərindən də narazılıqlarını bildirirlər”.
Rezidentura haqqında yeni Əsasnamə hazırlanır
Komitə sədri Əhliman Əmiraslanov deyib ki, rezidentura haqqında yeni Əsasnamə hazırlanır, dəyişikliklər olacaq. O bildirib ki, hazırda yan ixtisaslar rezidenturada yoxdur: “Ancaq bu gün Türkiyədə, dünyada mövcud olan qanunlara əsasən, kimsə onkoloq olmaq istəyirsə, cərrahiyyə üzrə rezidenturaya gedir, bitirəndən sonra yan ixtisas kimi 1-3 il ərzində təhsilini davam etdirir. Azərbycanda da elə ola bilər. Onkoloq radioloq, döş qəfəsi, beyin üzrə onkoloq kimi ixtisaslar olacaq. Səhiyyə Nazirliyində artıq bu istiqamətdə iş gedir. Maaşlarla bağlı məsələ də yeni Əsasnamədə öz əksini tapacaq”.
"Rezidentlərin maaşı həkimlərin tarif maaşına bərabərdir"
Parlamentin Sosial qanunvericilik şöbəsinin müdiri Adil Vəliyev deyib ki, rezidentlərin maaşı həkimlərin tarif maaşına bərabərdir. Şöbə müdiri rezidentlərin maaşının az olması barədə iddialara da münasibət bildirib: "Nazirlər Kabinetinin 2024-cü il 6 sentyabr tarixli qərarı ilə hər bir təhsil alan rezidentə düşən illik vəsait 5600 manatdan 8600-ə qaldırılıb. Onların aylıq vəzifə maaşı həkimlərin tarif maaşına bərabərdir, yəni bu rəqəm hazırda 550-575 manat arasındadır. Bu da onların dərəcələrinə görə dəyişir. Həkimlərin də tarif maaşı 550-700 manat arasındadır”.
"İlkin səhiyyənin gücləndirilməsi vacibdir"
Millət vəkili Soltan Məmmədov deyib ki, ilkin səhiyyənin gücləndirilməsi vacib məsələlərdən biri olaraq qalır. O bildirib ki, əsas maraq doğuran məsələ insanların tipi xidmətə əlçatanlığının təmin olunmasıdır: "Bu baxımdan ilkin səhiyyə ilə bağlı dinləmə artıq öz nəticəsini verir". Deputat bildirib ki, vərəmlə bağlı keçiriləcək dinləmə də payız sessiyasında ən vacib tədbirlərdən biri olacaq: "Vərəmlə bağlı biz həm beynəlxalq təşkilatlarla əməkdaşlıq edirik, həm də bugün artıq TƏBİB-də yeni mərkəz yaradılıb. Eyni zamanda Səhiyyə Nazirliyinin Elmi-Tədqiqat Ağciyər Xəstəlikləri İnstitutu fəaliyyəti göstərir. Bunların fəaliyyətinin koordinasiyasına gəlincə, biz Ümumdünya Səhiyyə Təşkilatının aktiv üzvü kimi onların tövsiyələrini icra edirik. Ona görə də vərəmlə bağlı keçiriləcək dinləmə bu payız sessiyasında vacib məsələlərdən biri olacaq. Təkcə o dinləmələri təşkil etmək deyil, sonradan qəbul olunan qərarları monitorinqini də keçirmək mümkündür".
Komitə sədri Əhliman Əmiraslanov qeyd edib ki, gələcəkdə də səhiyyənin ən vacib problemləri ilə bağlı dinləmələri keçirməyə davam edəcəklər.
