Birləşmiş Millətlər Təşkilatının Əhali Fondu (UNFPA) bildirib ki, İsrailin yardım girişini əngəllədiyi və hücumları ilə humanitar fəlakətə səbəb olduğu Qəzzada 50 min hamilə və uşaq əmizdirən qadın günlərdir ki, yemək yeyə bilmir.
Sherg.az xəbər verir ki, UNFPA-nın Ərəb Dövlətləri üzrə Regional Ofisinin yaydığı açıqlamada qeyd olunub ki, Qəzza zolağındakı hamilə qadınlar, analar və körpələr olduqca çətin şəraitdə yaşamaq uğrunda mübarizə aparırlar.
Körpələrin vaxtından əvvəl və aşağı çəki ilə doğulduğu, körpə qidalarının isə tükəndiyi vurğulanıb.
Açıqlamada deyilir:
"Qəzza zolağında yenidoğulanlar ölüm və ya ömürboyu davam edəcək sağlamlıq problemləri riski ilə üz-üzədir. Bunu önləmək mümkündür. Qəzzanı humanitar yardımlar üçün açın."
Mart ayından bəri Qəzzanın sərhəd qapılarını bağlayaraq yardımın daxil olmasına imkan verməyən İsrail bölgədə hücumları ilə humanitar fəlakətə səbəb olur.
İsrail ordusu, mülki infrastruktur və məcburi köçkün fələstinliləri sistemli şəkildə hədəf alır. Qəzzada aclıqla mübarizə aparan və yemək tapmaq ümidi ilə ABŞ-İsrail yönümlü "Qəzza Humanitar Yardım Fondu" tərəfindən yaradılan bölgələrə yaxınlaşan fələstinlilər də hədəfə alınır.
İsrailin guya humanitar yardım bölgələri kimi təqdim etdiyi, əslində isə ölüm tələsinə çevrilmiş ərazilərdə fələstinlilərə qarşı həyata keçirdiyi sistemli hücumlar nəticəsində 27 maydan bu yana ölənlərin sayı 766-ya, yaralananların isə 5 min 44-ə çatıb.
